“مستغرباني ” بقلم وحيد علي الجمال
مكحول وكاحل بالمكاحل
مضروب مابينهم الف فاصل
مش سعر معروض في العلن
ولا انت مسموحلك تفاصل
أنزل وخبط في المفاصل
اعرب لي بعد الحذف فاعل
خليك ملاحظ البرد فوقك
ضارب في موتك
على ضعف صدرك راكن وراكز
مفعوله ناقص حبة لطائف
وللضرورة فتوى وصورة
فاهم ياصاحبي حد المذورة
قيس المسافة تلقي فاتورة
هتشيل وترفع وبيع دتورة
علشان تعيش لازم تموت
تقل هدومك خاف البارود
من أي حاجة تكسر ازازة
فصل السياسة عن العبادة
وانت بتبحث عن الخلود
وتزيد عليك الكافيه كافيه
وبشرط لازم تعرف تعوم
وكل مادى محتاج زيادة
والكل ياكل بعضه بلذاذة
اسرق وبرر ميت الف عازة
صبحت هموم الدنيا عادة
واكتب لها 2000 رواية
حملك تقيل طالب نهاية
كام فصل فاضل على الرواية .
والدور ماعدشي لايق عليك
طب هات نبطشي يكتب قصيدة
ويقول كلام شبه الحقيقة
الدنيا حلوة ولا فيها ضيقة
واللي بيشكي شلة مريبة
اخرها تسكن زمن افتراضي..
الكل ساكت مبسوط وراضي
وازاي نجيب للكلمة قاضي
والجلسة بكرة ولاااا في ماضي
حصة علوم قلبت غيوم
والسقعة باتت جوة الهدوم
وانا اصلي ديما راجل كتوم .
المعطيات عكس النتائج
احسب معايا حجم الفوائد
مسطول بيطعن على الضرائب
اجيب منين وادفع لمين
وانا عقلي غايب
مافضلشي منه حبه بواقي
غيرت وشي ويه القناع
بكتب وخايف من البتاع
وانا عندي شعرة بتروح وتيجي
وجناني اصلي شبه الحقيقي
انت اكيد مستغرباني
بهد وابني بنيان قصيدتي
لا بحر يقدر يجي يعاتبني
ولا قافيه تقدر تجيب في سيرتي
مجنون وعاشق شكلي وقصيدتي
وحيد علي الجمال
التعليقات مغلقة.