مسرحية صرخة أولاد الشوارع ” الجزء الثالث ” تأليف منصور أحمد عبد المقصود

مسرحية صرخة أولاد الشوارع ” الجزء الثالث ”

تأليف منصور أحمد عبد المقصود

المشهد الثالث
…………
بعد اسبوع ………………. الاطفال نيام اسفل الكوبرى … يأتى من قريب صوت بكاء
صالح …. انتم سامعين الصوت ده
عبد الله …. ده صوت عيل صغير
احمد …. ايوه عيل بيبكى
صالح … الصوت قريب جدا
ينهض الاطفال بحثا عن مصدر الصوت يتسمر الاطفال امام لفافة بها طفل صغير يبكى
عبدالله …. يا نهار اسود فى حد يعمل كده
صالح …. بكل ما اوتى من دموع طيب ده ذنبه ايه يترمى الرمية السودا دى
احمد …. ربنا يخرب بيوتكم يا كفرة ربنا ينتقم منكم تخلفوهم وترموهم فى الشوارع
عبد الله … ايه العمل فى المصيبة دى
صالح …. الواد ده بيصرخ شكله ميت من الجوع
عبد الله …. طيب هنعمل ايه لو سبناه هيموت
أحمد … مين فيكم معاه فلوس
عبد الله …. انا معايا 5 جنيه
صالح … وانا معايا 7 جنيه
احمد … يخلع البلوفر الصوف ويغطى الطفل الذى سكت بعد ان انهكه البكاء ثم يخرج من جيبه 10 جنيهات
خد يا عبدالله الفلوس دى وروح القهوة هات كباية حليب وهات باكو بسكوت ساده وازازة مياه معدنية
عبدالله … هتعمل ايه يا احمد ؟؟
احمد … هنسقيله البسكوت فى الحليب ونأكله
صالح … عاوزين معلقة
عبدالله … انا هجيب معلقة بلاستيك من المطعم اللى قدامنا … يمشى عبد الله لأحضار الحليب والبسكوت
احمد …. بسرعة يا عبد الله
صالح….. هنعمل ايه يا أحمد ؟؟
احمد …مش عارف يا صالح لكن لو سبناه هيموت
صالح …. مش ممكن نسيبه
أحمد …. طيب هنتصرف ازاى
عبدالله … قادم ومعة كوب من الحليب وباكو بسكوت
احمد … هات يا عبدالله … يفتح البسكوت ويفرغه فى كوب الحليب ويتركه حتى يذوب
صالح …. يحمل الطفل بين يديه واحمد يطعم الطفل ثم يفتح ذجاجة المياه ويضع قليل منها فى الغطاء ويسقى الطفل يشبع الطفل ويستسلم للنوم
هجر النوم اعين الاصدقاء يفكرون جميعا ماذا سيكون مصير هذا الطفل وكيف لهم ان يتركوه … او كيف لهم ان يهتموا به ويحافظوا عليه
فى الصباح يذهب عبد الله واحمد الى كشك عم صليب بعد ان اتفقوا ان يبقى واحد منهم مع الطفل كل يوم لرعايته والحفاظ عليه
عبدالله … صباح الخير يا عم صليب
صليب … اهلا يا عبدالله … ازيك يا أحمد .. فين الواد صالح ..؟؟
احمد … صالح تعبان شوية ومش هيعرف يسرح النهاردة يا عم صليب
صليب … انتم مالكم شكلكم خلصان كده ؟؟؟ على فكره انتم مش رجالة وانا مش عاوز اعرفكم تانى
انتم متستهلوش انى اقف جمبكم يلا امشوا من هنا … وروحوا شوفوا انتم كنتم سهرانين فين … يلا روحوا كملوا سهرتكم
عبد الله … والله يا عم صليب احنا منمناش طول الليل لكن غصب عنا
صليب … ليه ؟؟؟ وايه اللى غصبكم
احمد … احنا امبارح لما نمنا سمعنا عيل بيصرخ تحت الكوبرى اهله رموه واحنا سهرنا عليه نأكله ونيمناه ومعرفناش ننام من خوفنا عليه
صليب … لا حول ولا قوة الا بالله … انت بتقول ايه
عبدالله … هو ده اللى حصل واحنا قولنا لصالح يخلى باله منه واحنا جينا عشان منقدرش نسيبه لواحده
صليب … روح انده صالح وخليه يجيب الولد معاه … حسبى الله ونعم الوكيل … حسبى الله ونعم الوكيل
عبدالله مع صالح والطفل فى كشك عم صليب
صليب …. وبعدين يا اولاد ايه المصايب اللى بتتحدف علينا دى بس يا رب الواد ده لازم يروح الملجأ
أحمد …. باكيا يعنى مصيره هيبقى زى مصرينا ويكبر ويهرب من الملجأ
صليب … ماهو مفيش حل تانى دى مسئولية يا ولاد ، خلى بالكم من الكشك لغاية ما اروح مشوار وأجى
صالح ….. هتوديه الملجأ يا عم صليب
صليب ….. هوديه لمراتى تغير له وتأكله وبعدين اوديه الملجأ خلوا بالكم هرجع بسرعة
صليب بالمنزل ومعه الطفل
مريم … ده مين ده يا صليب ؟؟ ابن مين الواد ده
صليب … معلش يا مريم ده عيل لقيط العيال لقوه تحت الكوبرى
مريم …. وجايبه هنا ليه ؟؟؟
صليب ينوبك ثواب يا مريم تنضفيه وتأكليه وانا هاخده واوديه الملجأ بس نضفيه وأكليه عشان خاطر ربنا
مريم … ربنا يسامحك يا صليب انت بتجيب المصايب دى منين
صليب … معلش يا مريم والله هوديه الملجأ بس اكليه ونضفيه عشان اوديه نضيف
مريم … تنزع الملابس من على الطفل … الحق يا صليب ده مش ولد
صليب … امال ايه ؟؟
مريم …. دى بنت …. عمض عينك يا صليب
صليب … هأهأهأ ، لا حول الله يا رب
مريم …. يا خبر ابيض على الجمال يا صليب … ما شاء الله ، شايف يا صليب بتضحكلى ازاى
صليب … ربنا ينتقم من اهلها
مريم …. يا صليب الحق فى ورقة فى هدوم البنت
صليب …. يا رب تكون فيها حاجة عن اهلها
مريم …. لأ دى ايه من القرأن
صليب …. تبقى مسلمة يا مريم … على كل حال اكليها ونضفيها وهاتيها اوديها الملجأ
مريم …. الحق يا صليب .
صليب …. خير يا مريم …
مريم ….البنت ماسكة فى ايدى ومش عاوزة تسيبنى
صليب …. يلله يا مريم انا مش فاضى
مريم …. طيب سيبها وابقى وديها فى اى وقت تانى خليها يومين تدفى وتاكل كويس وابقى وديها بكره والا بعده
صليب …. انت شايفة كده
مريم … البنت اصلها شكلها عيانة يا عينى ، ترد صحتها ووديها
صليب …. طيب انا ماشى
مريم …. وانت جاى حود ، هات للبنت غيرات ، وهات معاك لبن وينسون وكراوية
صليب … هو فى ايه يا مريم ؟؟؟
مريم …. ماهى البنت لازم تاكل ولازم لها غيارات … انت هتوديها ملط
صليب …. حاضر يا مريم.
صليب فى الكشك مع الاولاد
احمد … خير يا عم صليب
عبدالله …. وديته الملجأ يا عم صليب
صالح …. طمنا يا عم صليب
صليب … الواد طلع بنت ومراتى هتأكله وتنضفه وبعد يومين اوديه الملجأ
يلا كل واحد فيكم يشوف مصلحته
عبدالله … ربنا يبارك فيك يا عم صليب
صليب … حقكم على يا ولاد انا ظنيت فيكم ظن وحش لكن والله طلعتم رجالة وعندكم ضمير انا اسف يا صالح واسف ليك يا عبدالله
احمد … احنا اللى اسفين يا عم صليب احنا اللى سببنالك المشاكل وانت ربنا يجازيك الخير كله
………
غدا باذن الله الجزء الرابع