مسرحية صرخة أولاد الشوارع ” الجزء الثاني “
بقلم منصور أحمد عبد المقصود
الجزء الثاني
…………………
صالح – عنك يا عم صليب احنا ننزل عنك
عبد الله – ناولنى يا صالح
أحمد – ادينى وأنا أرص يا عبدالله
يشارك الأولاد فى تفريغ العربة وسط حالة من الدهشة واضحة على وجه عم صليب لم يستطيع أن يخفيها لكنه بلا أولاد فأسعده أن يقدموا له المساعدة
أحمد – يا عم صليب أحنا تعبنا وعايزين نشتغل ، جربنا واكسب فينا ثواب
عبد الله – والله تعبنا وعاوزين ناكل لقمة من غير ما حد يجرى ورانا ممكن تساعدنا يا عم صليب
صالح – والله انت راجل طيب واحنا هنخدمك بعنينا بس كفاية تعبنا من الشارع ومن جرى الناس ورانا وجرى الشرطة ورانا ساعدنا ربنا يخليك
صليب – شوف يا بنى انت وهو ، انتم شكلكم أصلكم طيب
طالما إنكم بتفكروا تعيشوا محترمين ، أنا موافق أساعدكم بشرط ، إنكم تثبتوا إنكم حقيقى أصلكم طيب
أحمد – ودى نثبتهالك ازاى دى
صليب – بضحكة عالية دونما إستهزاء هأ هأ هأ
أنا موافق أشغلكم ،
انتم الثلاثة أصحاب مش كده ؟
الثلاثة معا – أيوة
صليب – واحد هيقف معايا فى الكشك
والتانى يوزع جرايد هياخد عدد بسيط ولما يخلصه يرجع ياخد غيره
والتالت يبيع مناديل وياخد دستة بدستة يخلص ويرجع ياخد غيرها
والحساب هيكون على اللى اتباع
يعنى تدفع تمن اللى خدته وتاخد غيره إيه رأيكم ؟؟؟
الثلاثة – موافقين طبعا
أحمد – لكن هتحاسبنا ازاى ؟؟
صليب – أنا هعمل لكل واحد فيكم هامش للربح يعنى
الجرنان أنا ببيعه على الفرش بجنيه ، انت بتبيعه بجنيه وربع
ليك فيهم 15 قرش وأنا عشر قروش ، ايه رأيكم ؟؟
أحمد – زى الفل
صليب – والمنديل تمنه على الفرش 30 قرش
انت بتبيعه 50 قرش تاخد 10 وانا اخد 10 ،موافقين والا ايه رأيكم ؟
صالح – طبعا موافقين
عبدالله – لكن التالت اللى هيقف معاك هتعمل معاه ايه ؟؟
صليب – أنا هيرجعلى منكم 20 قرش من كل منديل وجرنال
هدى لصاحبكم عشر قروش وأنا هاخد عشرة
الثلاثة – فى حال الإنبهار
عبد الله – بس انت كده تعتبر مش كسبان واحنا اللى كسبانين
صليب – لو اشتغلتم كويس هكافئكم مكافأة كويسة
أحمد – يبقى أنا ابيع الجرايد
صالح – وأنا أبيع المناديل
عبد الله – وأنا اللى هقف معاك يا عم صليب فى الكشك
صليب – أخرج عشرة جنيهات من جيبه ونادى على عبد الله ، روح أشتريلنا سندوتشات وانت راجع عدى على القهوجي وقوله ، يعملنا 4 شاى نحبس بيهم بعد الفطار
عبد الله – أحلى فطار و القهوجى جاى ورايا بالشاى تناول الجميع إفطارهم
أحمد – ادينى 100 جرنان يا عبدالله
عبدالله – ادى أحلى تشكيلة ربنا يجبرك
صالح – هات خمس دست مناديل يا عبدالله
عبد الله – خمس دست مناديل لصالح ربنا معاك
انقضى اليوم الأول
فى منزل صليب
صليب – مساء الخير
مريم زوجة صليب – مساء النور .. الحمدلله على السلامة
صليب – الله يسلمك ، إيه الأحوال ؟
مريم – الحمد لله ، خدلك حمام لحد ما أجهزلك العشا
صليب – لا أنا مش عاوز اتعشى مليش نفس
مريم – ليه انت أتعشيت برة والا إيه ؟
صليب – لا أبدا بس شبعان وعاوز أنام خفيف
أما النهاردة حصل موقف
مريم – موقف إيه … خير يا صليب
صليب – تلات عيال شغلتهم معايا بس حاسس انى عملت خير كبير
مريم – منين العيال دول يا صليب
صليب – عيال غلابة من اللى ملهومش أهل جونى وطلبوا منى الشغل وأنا شغلتهم بس عيال رجالة
مريم – وانت ازاى تعمل حاجة زى دى
انت تعرفهم والا تعرف أهلهم
صليب – أنا معرفش غير انهم عاوزين شغل وأنا شغلتهم
مريم – هما كانوا من بقيت أهلنا يا صليب مش ممكن يزعلوا الناس منك أو يسرقوك
صليب – لا متخافيش اللى فيها لله ، عمرها ما تغرق
مريم – طب خلى بالك احنا ملناش غير بعض .. حافظ على نفسك
صليب – سبيها لله
التعليقات مغلقة.