مش حارجع لك
جمال زكى عينر
مش حارجع لك ابدا تاني
انا مش حارجع ليك
مش حديلك تاني حناني
مش راح افكر فيك
ليه انا اعيش تعبان ؟
نفسي اعيش فى امان
نفسي يعدي اليوم الاقيني
يوم بايت فرحان
ما تفكرشي ف يوم تلاقيني
بحبك زي زمان
سيبني ف حالي روح وانساني
انسى سنيني وانسى زماني
ذكرى ايامنا الحلوه اهي راحت
راح وياها احلى اماني
فاكر لما انا كنت بحبك
كنت بقربي وكنت انا قربك
كان الشوق دايما يكويني
لما تروح وتغيب عن عيني
كان في سؤال دايما على بالي
امتى حبيبي يا دنيا يجيني ؟
خنت الحب و خنت ودادي
حبي ف قلبك بقى شيء عادي
انا برضه حانساك وراح اقسى
خليك فاكر انت البادي
كنت حاسس بيك يا خاين
غدرك كان في عيونك باين
يعني غدرك مش مفاجأة
رغم لحبك كنت انا صاين
انا دلوقتي ارتحت خلاص
عايش مع نفسي باخلاص
ولقيت نفسي ف وسط الناس
انا فى الدنيا بقى لي مكان
مش راح اعذب روحي تاني
مش راح اعيش مع حد اناني
حاسس انى بقيت شىء تاني
حاسس اني بقيت انسان
ليه من تاني اعذب روحي ؟
بعد ما طابت كل جروحي
ليه انا اعيش ببكايا ونوحي ؟
وارجع اقاسي من الحرمان
بصمت خلاص والله بالعشرة
ع اللي غدر بي وخان العشرة
عمري ما حارجع ليه من تاني
مش راح اقول يا خسارة يا حسرة
بقلمي الشاعر جمال زكي عينر
التعليقات مغلقة.