مش شطارة.بقلم.وحيد على الجمال
مش شطارة أو مهارة
إني اكتب كام قصيدة
فيها اكتر من عبارة
تركيبات مرصوصة رص
تشبيهات مقصوصة قص
زي درس في قلب فصل
لا أنشرح ولا فهمه عقل
أو موسيقى صوتها عالي
لحنها قاتله النشاذ
بحرها فيه الف كسر
زي خاتم ناقصه فص
شكله خالي م الجمال
روحها غايبه من المشاعر
زي حفرة وسط شارع
لخبطة كل الشوارع
زودت في السهل مانع
طوب وطفش واي هتش
مونه مخلوطه بدبش
وان نصحته وكنت صادق
يبقي رافض للنصيحة
كأنه كان في الشعر شوقي
أو في سلطان البارودي
ده يادوبك لسه بادئ
يقرا في الشعر المبادئ
وان فن الشعر اكبر
م اللي مكتوب في الموالد
صنف تاني في القصيدة
هو شاعر بالسليقه
فطرته فوق الخليقه
له كلام يلمس في روحك
يوجعك ويدوس جروحك
مستحيل انك تسيبه
أو يخالف يوم ضميره
صاحب الفطرة السليمة
شجعه اوعاك تسيبه
راح يكون في الشعر حالة
تبقى اكتر من مفيدة
بكره يبقى زى بيرم
او فؤاد حداد ونجم
بس تعرف خدت صفر
شئ بيفقع للمرارة
لما تلجأ بالقصيدة
لمدعى وفى اصله واهى
هتلاقيه رافع لحاجب
وفى عيونه تشوف خسوفك
ساكن انت في الحضيض
وهو يعني في برج عالي
وفي ردوده أن سألته
تحسه سايق في التعالي
مش عارف له أي مسلك
فلسفه شابكه في خيوط
زي بيت العنكبوت
تبقى نفسك فيها تضحك
أو تقوم فجأة تعيط
والاكيد أن انت قاعد
كل مرة تهز راسك
البعيد قال يعني فاهم
كل مرة تقول ياسيدى
الجمال ده ماشوفتهوش
مخي يشبه مخك انت
في القصيدة عاش جلوص
أو بهيم يشبه جاموس
المجاملة كل ماتزيد
في المشاعر يبقى للتافه
كروش
يتنفخ ببطانة هابطة
هو أصلا م الهاموش
هو فن الشعر ينفع
غير بتجسيد الظروف
يوم ماتعرض للقصيدة
تلقى حرفك زار نفوس
منها شاف حلمه وصدق
واللي خد وصفك وطبق
و اللى عدل طبع حرفه
واللي ربك فيها وفق
لو وصلت و للنهاية
قبل ماتسبني امانه
دعوة حلوة بعدها
لازم تكبر
وحيد علي الجمال
التعليقات مغلقة.