مـش هتتحملي
بـقلم أسـمـاء الـبـيـطـار
كتير مننا طلع لقى كل حاجة محتاجها بيطلبها من والدته رغم إن الأب موجود مش إهمال منها ليه و لكن من باب إنه جاي تعبان من الشغل
بيبدأ الأمر بحاجة صُغيرة
ماما عاوز قلم
ماما عاوز كراسة
ماما عاوز ادفع المصاريف
ماما مش عارف اذاكر
ماما تعبان
و بتفضل ماما ماما ماما
و هي بكل بساطة بتحَجز الولاد عن الأب علشان خاطر تعبان
جاي متعصب . جاي متضايق .. جاي .. جاي
و بتفضل هي تشيل و هو يحسب إن دي طبيعة الأمر لحد تقريباً ما بينسي إن في بيت و عيال و مسئولية من اصله .
صحيح مش ذنبه و مش قصدها .
بس في نهاية الأمر الدُنيا بتوصل لمنعطف صعب جداً و على جميع افراد الأسرة .
ربنا خلق لكل واحد فيكم دور و خلق اوقات نقدر نتكلم فيها ما حبكتش و هو جاي من شغله تقابليه بهم العيال .
و إذا كنتي تقدري تتحملي المسئولية في مرحلة ففي مرحلة لابد من وجود سلطة الأب لأن الطفل اللي تحت ايدك دلوقتي بتاع حاضر و نعم هيبقى فيما بعد شاب متمرد محتاج صلابة و حزم في التعامل .
و صدقيني مش هتتحملي لأنه مش دورك و مش طبيعتك كأمراة
و كتير العاطفة بتضيع العيل فلابد من وجود العقل و الحكمة مع العاطفة علشان تعدي بأولادك وولاد و بنات على فكرة لبر الأمان .
كل واحد يشيل شيلته و حِمله علشان المركب تمشي
لأن معظم مشاكل البيوت من تحمل المسؤلية لطرف واحد على حساب الأخر .
و النتيجة هتبقى سيئة للأسف و الولاد اللي ديماً بينوبهم العقاب الأكبر لو حصل انفصال لا قدر الله .
صحيح في رجالة ما بتصدق بس دوول مش اللي بنتكلم عنهم اكيد
إحنا بنتكلم عن راجل البيت يا ست الكل اللي ممكن يحس انه مُهمش في بيته فمن فضلك ما تخديش دوره .
التعليقات مغلقة.