مش واحدة أنا شعر جيهان النجار
أنا مش قصيدة
بتنكتب وبتنقري
وبس وخلاص
انا سادس الخمس الحواس
أنا حد لما يفككوه
يطلع بناس
بكتير أوي
يطلع مقاس
الحب
عرض الجدعنة
وطول الوفا
*مش واحدة أنا
أنا كون وقلبه
مااكتفى
من عاشقين
انا أول الحزن النبيل
انا آخر الصبر الجميل
أنا نيل بيروي
حلم مصر وأهلها
وبامثل الناس كلها
انا عضو مجلس
حضرته
وعندي حصانة
بنظرته
انا دايرة الشوق
الحلال
أنا بنت خال الحب وحياة النبي
فاهمة يا دنيا…. بتكتبي؟
*اتكي جامد ع الحروف
اوعي تسيبي أي معنى للظروف
اتأدبي
*أنا مش قصيدة
وفكرة وشوية حروف
انا نصي خوف
أما اللي باقي مذهبي
فقه الأمل
وشويتين نور محتمل
انا وردة شوكها
من رضا…. وحبة ندا
ونهار جديد الله أعلم باللي فيه
*أنا حاجة حلوة
وربنا
انا معني حلو…
الله عليه.
التعليقات مغلقة.