مصر غنوة
بقلم مدحت رياض
مصر يعني كتاب ومدنا
يعني فاس أو بندقية
إيد بتكتب إيد بتبني
عين بتحرس توب بهية
شاب بيغازل ترابك
روحه تتقدم هدية
ولا بيسابق عداكي
يرسم الفرحة اللي جاية
يبتسم يشبه جمالك
يكتب الحلم اللي جالك
إن إسمك يبقى عالي
عنده أصلًا دي القضية
ع النايات بيغني ليكي
لو صعيدي بجلابية
وف قنالك يحكي مجدك
يرسمه بالسمسمية
وف عروسة البحر شايلك
جوة قلب البمبوطية
لما يتغرب يا غالية
تعرفيه من وسط مية
دمعة تنزل لما إسمك
يتذكر لو صدفة جاية
يرسمك ضحكة في ملامحه
أو عروسة في مشربية
عارفة دمه لو عشانك
يدفعه ويقول شوية
إنتِ نبض قلوب ولادك
إنت سحر الدنيا ديا
التعليقات مغلقة.