معدش في الغرام عبلة … بقلم الشاعر محمد عبد الفضيل
لا كنتي في الغرام عبلة
ولا في شعري هكون عنتر
غرامك زي ماتش في كاس
رميت له الكورة وبسنتر
بسرعة جه علي وداس
بقيت عل الخط متقنطر
رباطنا في الصباع دبلة
في إيديك مدهبة بمحبس
ولو هغضب هكون عبرة
ويمكن أروح لميت محبس
فليه نعملها كده شكلة
ردي حاجاتي مش أكتر
فراقنا مصلحة ليكي
وبرضه أكيد دا خير ليا
شوفي لك حد يداديكي
معدش في قلبي حنية
حايلت كتير أنا فيكي
قساوتك أثرت فيا
و عند ك كان يزيد أكتر
وجبت في آخري مش هقدر
أقولك في الهوي كلمة
واسهر جفني ومنمشي
بقت بايخة وكمان تلمة
مصدقت الكلام يمشي
ما قاله لساني ميت مرة
وكان عل التقل متصبر
سقاكي الشهد مكرر
فدقته لقيته متعكر
وخدت ليه الدلع ميزة
عملتي سفيرة وعزيزة
شريتك بأغلي ما عندي
وبعت حبي ببريزة
مشاعري قليلة ورخيصة
مشاعرك عندي كات أكتر
ومش رافضك وبتكبر
لكنك ماشية بمرايا
تبصي فيها فتشوفك
فتنسي بيها دنيايا
مسيرها في يوم هتتكسر
ومش هقدر
أروق لك تاني وأرجع لك
ولا أتحمل ولا أتصبر
ولو خلصت بنات حوا
لا عمري ما في مرة هند ه لك
حبيبة قلبي من جوا
ولا هترجي يوم أهلك
أعود ليكي .. وتعودي ليا
مسيرها في يوم هتتدبر
ولو تتقضي عزوبية
وآهو بناقص كمان مهرك
دا حبة فكة مش أكتر
خلاص خلصت
بلا عبلة ولا ليلي
ما عنتر هج شعره وراح
وقيس عايش سداح في مداح
معدتيش في الغرام هايلة
ولا في شعري بقيت مداح
هسيبك للزمن يحكم
وأقول كات غلطة مش أكتر
التعليقات مغلقة.