معقوله …
أشرف الشناوي
معقوله الدنيا هتضحك تانى
والحزن هيبقى فى قلبى غناوى
والباقى فى عمرى هيبقى براح
ملقاش ولا شبر فى روحى جراح
معقوله
معقوله الليل هيعدى
واشوف الضى
واضحك من قلبى فيرجع حى
والصبح هيزرع فيه ياسمين
معقوله الحلم هيطرح تانى
فى قلب الطين
معقوله
معقوله القبر ينبت نور
ويدق الروح فنعدى السور
معقوله هيرجع تانى
ازاز مكسور
ووشوشنا هترجع
زى ماكانت .بعد ماشاخت
معقوله خلاص
النكته دى باخت
معقوله
معقوله الليل هيدق اوتاده
فى نن عنينا
من غير مانحس نلاقى
الموت حوالينا
وياخدنا القطر وشجر التوت
معقوله فى كل دقيقه نموت
فازاى الروح هتكمل
فى الملكوت
معقوله
معقوله الحزن هيمسك
فينا ويتبت
معقوله هنفضل كدا نستنى
فى ضحكه تنبت
معقوله الحرب هتبقى سلام
وازاى الحزن هيفرش كفه ننام
معقوله هنرجع تانى حمام
معقوله
معقوله الصبح هيطلع بالعصافير
وغيطان الروح يملاها عبير
وحيطان الدار تتملا تصاوير
وهانسمع تانى التواشيح
معقوله الحلم يصد الريح
معقوله قلوبنا هترجع
زى ماكانت غيه
معقوله هنرجع تانى
لزمن الاوليا
والدنيا هترجع
زى ماهيه
معقوله………………
اشرف الشناوى
شاعر عاميه
البرامون
التعليقات مغلقة.