معقول كده
بـقلم أسـمـاء الـبـيـطـار
و في يوم صحيت
من منام على تُقل راس
على دق قلب مش طبيعي
على تُقل دم
دماغي فاضيه من كل هم
و بيني و بين نفسي
بقول
مالك يا بت؟ حالك يغُم !
لملمت حالي و حال عيالي
نَفسي طابق ما عرفش ليه
دق فجأه جرس
خلى قلبي يطُب
تعالى خلاص
ابوكي ………..
و بعدها مـ بقتش سامعه
غير وش
شديت عودي و نزلت قوام
دموعي سابقه خطوتي
معقول خلاص راح الأمان
راح اللي كان دعاويه مدد
و دخلت عليه صلبه طولي
و لا اجدع ولـد
كانت وصيته مـ عرفش ليه؟
يمكن عارف قلبي الورق
و مش عاوز يشوف دمعه
جوه قلب الكـفـن
أصلي ما كنتش بهون عليه
وصاني عليا
قبل ما يوصيني عليه
اتكسرت عليه
اترميت فـ حضنه
صوت سلامه جوه قلبي
و شادد عليه
المنام أمانه يا بويا
و سمعت صوته
بيضحك عليا
يا بنت قلبي كفايه عليا
دخلتك بعود ريحـان
بس شدي حيلك
و افتكريني بدعوة
يا كل الحنان
معقول يا بويا
ضحك تاني عليا
زي مـ كان بيعمل زمان
يا بنت عُمري يا صُلب ضهري
يا عُمري اللي راح و اللي جاي
بس نسيت إن بنت قلبك شابت
يوم ما اتكفت عليك
يوم ما راسها بقت
شبه الكـفن
قومي يا بت ووسعيلي
من يومك نكد
ضحكت .. و نِشفت دموعي
و من يومها مـ بلش ريقي
حتى بمنام .
مـعـقـول كـده .
التعليقات مغلقة.