مـا كـنـش الـعـشـم
قلم أسـمـاء الـبـيـطـار
” ما كنش العشم ”
جملة دارجة يمكن أغلبنا مر بيها ، و قالها ، ووجعته ، و يمكن أثرت على علاقاته فيما بعد ، و غيرته و غيرت طريقة معاملته .
و لكن …
عشمك ده نوعه إيه ؟
إيه ده هو العشم أنواع !
آه طبعاً ..
في عشم ..
بتتعامل فيه مع كل اللي حواليك بطبيعتك ، بفطرتك ، بكل ود و محبة للجميع ، بطريقة بسيطة ، بعفوية زااايدة ، و كأنك بتتعامل مع الكل كأنه حتة منك ، حتى لو ما كنش يقربلك من أساسه .
بتخدم الكل ، و بتبذل أقصى جهدك إنه يكون مرتاح ، و مبسوط ، و راضي ، بتعمل اللي عليك بقلب قووي و مخلص .
و يمكن النوع ده من الناس اللي أتوجعت ، أتكسرت ، و مش بتبقى فاهمة إيه الغلط اللي عملته ؟!
لما بتحتاج لحد و ما بتلاقيش ، لما موقف صعب يمر عليها و تلاقي اللي عملته زي ” اللي زرع ورد في صحرة ”
و لأنها كانت بتتعامل بكل حب ، فغالباً الحب هيبقى هات و خُد .
و النوع ده بالذات مش هنكدب على بعض لما نقول :
” إنه على الأقل كان متعشم إنك تعامله زي ما بيعاملك مش أكتر ”
و في عشم فضولي..
نقول يعني إيه ؟
يعني تلاقي ناس داخلة في أدق تفاصيل حياتك ، عوزه تعرف عنك كل حاجة ، ممكن تلاقيها عوزة تعمل بدالك أساسيات بحجة إنها بتريحك ، بتحبك ، متعشمه إنها تركنك على الرف !
و تبقى هي بس اللي موجودة في الصورة .
بتدخل تفتح تلاجة بيتك بحجة العشم !
و علي فكرة دي أكتر ناس ما تعرفش عنها حاجة غير ” الحمد لله ” !
نوع من الناس و للأسف موجودين بطريقة أو بأخرى .
لكن في النهاية و حقيقي ..
العشم في كلي النوعين مش حلو ، مش معتدل .
لأن الأول بتدي كل حاجة و بتنسي نفسك ، لحد أول موقف حقيقي هيمر عليك و يفوقك ، بس إياك تفوق !
و النوع التاني بيبقى عاوز ياخد و يعرف كل حاجة بحجة العشم !
و النوع ده شئنا أم أبينا بيوصل لمرحلة القطيعة التامة في بعض الحالات فيما بعد
لأن مهما كان عشمك في حاجة إسمها خصوصية .
و مهما كانت بساطتك ما بتحبش أيا من كان يتعدها و بأي حجة كانت .
إعتدلوا لأن كل شئ له مردود سلبي حتى لو نيتك كانت خير .
التعليقات مغلقة.