مـــــــــزارع…بقلم معوض حلمي
باحبك نضـيفه ولطــيفه وبهـــيه
والمـلم عشـانك خـيوط الــــنهار
واحرس بيبـانك بروحي وعينيه
واكــره منــافـق حــرامـي الأثـار
وارفــع آدانـك فـي كل الجوامع
باحبك لأني في غيطانك مزارع
باخضر خدودك بزرعي اللي طالع
واحـبك برغم الصدود اللي منك
وادور غصب عنك والف الشوارع
واسأل عليـكي الحـواري الوفـيه
باحـبـك يابنـت اللـذيـنا عـفـــيه
واحبك جحوده وعنـيده وشقيه
ولا اقـبل يغيظني فهواكي شريك
واحبك تناغشي القوليب اللي فيا
واحب الفواعلي اللي شايل كوريك
واحــلف بكـل المــذاهب واكـمل
مالكي وشافعي وكمان ابن حنبل
بإنـه اللـي أشـرف وأكـرم وأنبل
مـنـهم جـمـيعا بـتــوع الرصـــيد
لنـبـي وديـنا ونـســر الصـــعـــيد
وناس صنـفونا دا عبد ودا سيد
وإنه الوحـيد الحـقيـقي وعفـيف
وإنه الشـريف اللي سايب ميراثه
في ريحة المباني وقاعدة رصيف
وإنه اللي حـبك شديده وعـفـيه
وحـبك جاحوده وعنيده وشقـيه
وحبك بتهدي اللي ضـل وكفيف
ياضـلك خفيف ونكته ف ناديهم
يابنـت اللـذينا شـافوكي بعنـيهم
لابسـه العـبايا الحـرير السـريسي
واحـبـك سيناوي يشـارك سـويسي
ويزرع ف مانجه ناعومي وعويسي
يبيعها في سوق الخميس والتلات
واحب البداوه هناك في الواحات
واخـويا اسماعيـلي بيـنده علــــيا
وجايب معاه في الجراب سمسميه
ونطلع في صحبه نزورهم سويه
واشوفك سامـيه وجميله وماريه
وانـتي تشـوفيني كـأني مفـــيش
ماليـش أي لازمـه وزايده عيوبي
والـعـن أبـوكـي وتكـــتر ذنـوبــي
واشوف شكلي فيكي قناوي ونوبي
واحـبك تـتـوبي وتنـسي الشــقي
والفك في توبي وادوب معـشقه
واموت بس نورك يدوم بعد موتي
ويطلـع يـزور البيــوت شقـشـقـه
بقلمي الفلاح الفصيح /معوض حلمي
منشأة بطاش /تمي الأمديد /دقهليه
التعليقات مغلقة.