مرود قلق
شعر عبير عبدالمنعم
فجأة ظهرت في المراية
بنت كانت يوم معايا
كانت بتحلم بالحياة
صدفة ضحكت للورق
شافت الحلم اللي نايم
جوه جفن في يوم ما رق..
حلم عاصي ع الجفون
وازاي تكون متكحلة
بمرود قلق..
قالت بصوت مليان شجن
قلبك بيتنفس حنين
والروح محنيها الزمن
ارسم خريطة ترجعك
لغناوي تتهجى الفرح
طول الليالي يوصلك
والعمر كان هو التمن
ادفع تعدي ومن جديد
تبدأ تسمي في دنيتك
تنصب شرك للحزن
تصطاد القلق
خليك حكاية كل دار
خليك مدار
والكون يلف في دايرتك
إياك تبيع حلمك بلاش
الليل مجاش عشان تموت
الليل بيجي عشان تعيش
كم الف ميت كان وحيد
ولما حب قام وعاش
فجأة ظهرت في المراية
مسحت جبين الفجر
من لمحة ألم
قالت بعلو النبض للكون العجيب
قادر تدور ازاي وأقدامك قلق
عبير
التعليقات مغلقة.