مفيش فايدة …بقلم وحيد علي الجمال
قالتها وهي متضايقه
كأن الكلمة مش لايقه
و مخنوقة ومش طايقه
حوارك مهرته عارجه
حدودك كلها سايبه
مافيش تبرير ل أخطائك
مصمم تمشي ب دماغك
وتدخل عركة محسومة
كسرت بايدك الصورة
وصوتك أرض محظورة
ونص القصة محذوفة
خسرت رصيدك الباقي
وشوف سكتك عاميه
وأحلامك عيون لايمه
سفينه شراعها مش باين
ولا معروف لها ساري
ولحظة اندفاع نفسك
لا بتدادي ولا تداري
انا عايشة بقالي كتير
وبفهم معني ألغازك
مانيش تلميذه في رحابك
ولو خبتني في حجابك
وعديتني من التأويل
هبان لازم فى تحليلك
خلاص فسرت اوهامك
ومش هيفيد
تصور تانى فى جروحك
تمطر فى الخلا دموعك
عشان نغفرلك المشهد
وتبقي في أول النشرة
مافيش واحد من العشره
هيفرض حلمة ع الباقي
ويمنع صوتنا بالعافيه
هتتعوض وهتعوض
ساعتها قلبي هيمدد
ويتمطع في أحلامك
ولو فاكر قصايدك
فينا هتأثر
وشوشنا تاني هتقشر
وتغضب فيها تتحسر
اكيد وحيك عايش
فى الوهم ومبرطع
ولو شدوك على السيستم
ولا واحد هيفتكرك
ولا هيجيب لنا سيرتك
بلاش ظنك يكون وردي
تظن الطيبه هتجيبك
هتعدل مايله أو تدي
ولا هتوقف الدنيا
عشان تمسح دموع خاطرك
مهش واقفه عليك يعني
حاجات هتمر و تدوسك
وغيرها يعدى ويبوسك
وهتلملم في اشلائك
دفاترك ، كل اشياءك
و ف الآخر هتطرح أيه؟!
قصيدتك مين هيسمعها؟!
ومين اصلا لها سامع؟!
وتوبها عليك بقى واسع
وحرف حروفك الكافر
بكل الزيف هناك سافر
وسابك وانت قلب نضيف
وحج في دولة الشعراء
بدون مايقدم القرابين
بقا خارج عن القوانين
مافيش فايده
قالتها وهي مش طايقه
ونبض قلمها كان طايش
وسنه اجن م المجانين
وحيد علي الجمال
التعليقات مغلقة.