مقتولة شعر جيهان النجار

مقتولة

تعبت ونمت مقتولة….
وجاب الحلم بعض حاجات.
ومن ضمن
آمنا الغولة
وجاب الحلم نظريات…وجاب احضان على قبلات
وجاب حاجة
بعيد عن دولا…..
وعن دولا
لقيت فى الحلم..حضن جميل……وشوفت
التجربة الاولى
سمعت وحشتيني الأولى….
رميت نفسي
فى قلب عينيك
وروحت بعيد
اشوف حالي..
لقيت الشوق
بقى غالي
بقيت النظرة
تساوى حياه
انا والقلب
بين خلاف
هو يقولي
يالا نقوم..
وانا مش قادرة
اصلي باخاف
ومش عاوزة
اقوم م الحلم
عاوزة افضل هنا علشان لقيت فى الحلم الف عواف
فخليني بلاش تيجي تصحيني
جميل الموت
ف احضانك
بلاش ترجع
وتحييني
تعبت ونمت
وروحت اعيش
ياريت الدنيا تتعطل ومتزورنيش….
فخليني
هنا احسن..
هنا الدنيا كأنها
من حياه تانيه..مافيش فيها وجع….. ولاخوف …وفيها حبيب مابيسيبنيش
ولا بيخون
ولا بيهون
ولا مرة هيخذلني
مهما يكون.