ملامح عمر منسية بقلم الشاعر / مدحت رياض
وليه تحاول تكون أكبر
من اللي اتوقعوه منك
وليه دايما
ملامح وشك الباهتة
تبان للكل فوق سنك
وليه ظنك
بيقتل كل شئ جواك
فتسكت كلمة كات فكرة
وعايش فيها أو عايشاك
وليه دايما
تدوس على نفسك الهشة
وتتمنى
في وسط البحر لو قشة
تعافر بيها ايامك
تزق الحمل قدامك
ما كتفك أصله متجرح
وفي الدنيا
تعالى نعد إيه يفرح
ونقرا قالوا إيه عنك
بيحكوا عليك كتير ياما
واقربهم بعيد عنك
ميعرفش اللي حسيت بيه
ومريت بيه
واكتر جرح بتخبيه
وبتخاف في الحياة دي ازاي
وتفرح لما يحصل ايه
غريبة الناس؟
ساعات نفسك تكون أغرب
بتجري كتير ورا الفكرة
وتبعد لما بتقرب
فتلقاك فجأة متغرب
بدون أسفار
ساعات الغربة موش تبعد
بتبقى الغربة في الأفكار
فبتسافر وبتودع
وتحلم لو في يوم ترجع
وتحضن نفس أحلامك
وعارف مستحيل تقدر
تصالح ظلم ايامك
لكن تفضل في قلب القلب
فيه دقة
تحن لكل شئ ماضي
مهيش قصة تكون جلاد
ولا قاضي
هتفضل برضه بتعافر
تصالح نفسك أن تاهت
وتضحك حتى لو خدك
من الدمعة صبح باهت
وتبقى الشكوى دي لربك
في دعوة فجر مسموعة
فتبقى الدمعة ممنوعة
وتضحك مرة من قلبك
التعليقات مغلقة.