ملناش حظ…
أشرف يوسف علي
سيبت حياتي الأولانيه
وجيتلك علشان عايز أهرب
ولقيت تيار شوقك عالي
لمس القلب ف ثانيه اتكهرب
غصبن عني لقيتني بحبك
من جوايا ودوبت بشوقي
ولقيت شوقك زي الدم
بيجري ساعتها ف كل عروقي
حتي مشاعري بقت بتاخدني
لحد هواكي ف عالم تاني
عالم نسي عيوني الماضي
في الدنيا و غير عنواني
واتمنيت اني أعيش بكره
وبعده وكل حياتي معاكي
واندم عالعمر اللي نا عيشته
قبلك وما عيشتوش وياكي
مش بإيدينا حكم قدرنا
ولا نختار يا حبيبتي نصيب
ياما قلوب عايشين مع بعض
وشعورهم في القرب غريب!!!
وقلوب تانيه برغم البعد
تحس الكلمه عشان عيشاها
قبل ما تطلع من شفايفهم
دايما بيقدروا معناها
هي الدنيا كدا يا حبيبتي
طبعها دايما عمره غريب
بتفرق دايما في قلوبنا
ولا بتهني حبيب بحبيب!!!
ما اخترناش حظنا بإيدينا
حظنا هو اللي بيختار
ناس في الدنيا تعيش في الجنه
وناس تانيين بيعيشوا ف نار
ملناش حظ نعيش مع بعض
لكن دايما نعشق بعض
ولا عمرنا في الحب هنخلف
يا حياة عمري أبدا وعد
ولا عمرنا في الحب هنخلف
ياحياة عمري
أبدا وعد
الإثنين بتاريخ ٢٠٢٢/٩/١٩م
بقلم الشاعر : أشرف يوسف
التعليقات مغلقة.