مملكة الغربان بقلم / حسن أبوعرب
مين اللي قال إن الغراب
أغبى الطيور
ملهُوشِ دُور
كل اللي فَكر يوم كدا
لامؤاخذه تُ ور
دى مملكه هَوصِف نظامها فى سطور
أذكى الطيور هُوَّ الغراب
برئ تمامًا م الخراب
إن يوم دليلهُم
قام نعق
ينذر ثلاثا بالتواجد والحضور
ومفيش غياب
إبدأ محاكمه
افتح حساب
المحكمه راح تتنصب
القاضى أنثى ومُستشارها اتنين ذكور
والمتهم واقف ذليل
مِوَطى راس وجناح وديل
كل الطيور بيشكلوا حوالينُه سور
فى المحكمه مين اللى يكدِب
أو هَيشهَد مَره زُور
دا مفيش حَسَب
ولافيش نسب
ولا حتى واسطه
وأدنى جُور
كل اللى يِهدِم بيت ضعيف
مُلزَم يعِيدُه جديد نضِيف
واللي سَفَك أو يوم نَهَب
ولا كانشى أبدا يوم شريف
حَول ربيع المملكه جَد لخريف
قطع الطريق.. خان الرفيق
ساق النداله
يموت بمناقير العداله
ومن قاموسها يغور
فيا انسان تعلم من أمة الغربان
ازاي تعيش فى النور!!
التعليقات مغلقة.