من ألبوم الذكريات ” الذكرى الأولى – الرحلة النيلية ” بقلم سامح خير
لكل منا ذكريات لطيفة، غالباً ما تكون هى وقود السعادة فى حياته…تختلف شكل الذكريات و لكن السمة المميزة لها انها تستدعي الابتسامة على وجنتيك عندما تتذكرها…
خلصت قراية كتاب اسمه “إعترافات جامدة” لكاتب ظريف اسمه شريف اسعد ، فقلت منا عندي بلاوي زرقا ممكن أكتبها و أنافس شريف فى اعترافاته بس أنا مش حسميها إعترافات عشان مبقاش بقلد و بسرق حقوق فكرية فحسميها ” البوم الذكريات ”
النهاردة فتحت الألبوم فلقيت نفسى فى اولى إعدادي مع عائلتي الجميلة و بابا واخدنا فى أجازة نص السنة في كروز فى النيل بين الاقصر و أسوان …الباخرة كانت كلها ألمان و عيلتين تلاتة مصريين بس …و كنت لسة شاب وِرْوِرْ صغير و مش متعود على منظر الاجانب و انتوا عارفين الدنيا حر عندنا فى الصعيد و الاجانب بيحبوا يخدوا راحتهم … أجازة بقى
الرحلة دي بجد من أحلى رحلات حياتي لاني شفت شوية أماكن مهدور حقها فى خريطة مصر السياحية زي معبد الاله حورس فى إدفو مثلاً…المعبد دة لوحده أجمد مليون مرة من متاحف بلاد اوروبا بلا إستثناء اللى هى أصلاً كلها عبارة عن آثار فرعونية مسروقة …
المهم نرجع تاني لرحلة المركب اللى كانت full board و يحضرني هنا بقى موقفين و الأتنين حصلوا فى نفس اليوم على الغدا…
الwaiter جى بيسألنا تحبوا تشربوا ايه مع الغدا فلقيت بابا بجديته المعهودة بيسأله : قولي ..عندكم سڤن أب؟
الwaiter : اه يا فندم موجود ..تحبوا اجبلكم كام واحدة؟
بابا بتلقائية : لا نزلي اربعة بيبسي!!
ال waiter أصابته حالة من الخرس مصحوبة ببعض التشنجات بس أعتقد أتحسن على آخر اليوم …
أما أنا و أخويا الكبير فمبنعرفش نستر و خصوصا أنا و أصابتنا حالة من الضحك الهستيري لغاية ما ماما زعقتلنا عشان نبطل ضحك ….
الوقت عدى و أتغدينا و شربنا البيبسي و لقينا الwaiter بتاع السڤن اياه جى تاني بيقول لبابا : الحلو النهاردة يا فندم شو الا كريم …
بابا بصلي عشان كنت قاعد قدامه و سألني : ها ..تحب تاخد شو و لا عايز كريم ؟!
انا بما اني مش فاهم ايه هو الشو دة من أساسه فقلته بكل ثقة : أدينى كريم … على أساس ان الكريم اهو عارفينه البتاع الابيض دة اللى بيتحط على التورتة !
أما الwaiter فلقيته كاتم الضحكة و بيوضح لبابا : يا فندم أنا ببلغك ان الحلو النهاردة Show ala Cream دة حاجة واحدة مش اتنين …
بابا و الابتسامة على وجهه : طب محنا فاهمين…نزلنا اربعة بسرعة
الرحلة كانت مليانة شوية مواقف كوميدية كتير ، أفتكر منها أول مرة أشوف على الطبيعة حاجة أسمها جلابية Party و مقلكوش على الهرتلة اللى الاجانب كانوا عاملينها و طبعاً أخوتنا المصريين اللى شغالين على المركب و خصوصاً المرشدين السياحيين كانوا خاربينها مع الاجانب طبعاً .
أنا فاكر رجعت من الرحلة دي بقول لبابا و ماما ، أنا لازم أطلع مرشد سياحي
التعليقات مغلقة.