من بعض لازم تشبعوا شعر.. وحيد علي الجمال
هو الشتا مش يبقى
عكس الصيف
واحد يبرد جتتك
ويكسرك نصيين
تسخن مفاصلك كلها
والآه مع اللوزتين
تعطس وتمسك معدتك
جالي الوجع ده منين
صدرك قلب خروشه
والكحه فيك اجباري
وبعيد عن السامعين
ودموع اهي نازله
يدوب تسد العين
وزكام بينفخ وشنا
وينام على حلقنا
سلك بقى المنطقه
بنادول واتروفين
والصدر فيه مشكله
ماشي وانا مكتوم
لابس على جتتي
حملين تلاته هدوم
حد يقول للشتا
احنا بقى اسفين
مافيش مكان عندنا
حقيقي مش معزوم
احنا تعبنا بقي
م الحقنه والمحلول
شكل الشوارع بقي
زحلقني اوعى تقوم
مش لاقي طعم الدفا
نايم وكله هموم
والتاني فيه فرهده
والحر بقى حريين
مش لاقي نسمة هوا
أصرخ واقول يامخيف
ولعه ومن لسعته
عمال بقول يالطيف
أطلع على المصطبه
والتوته ع الجانبين
طمعان في حبة هوا
تلمس يدوب أتحرق
أزعق كما الدرويش
توهان ومش قادر
نفسي اشوف النوم
غرقان وجوه العرق
ديما كدا عطشان
والحسرة انك يعني
لسه يادوب شارب
لا مأثره المروحه
ومكيفك مشؤم
ساحب عليك كهربا
عايش معاه ف كابوس
بين الحوما والحوما
دقيقه ولا اتنين
والطقم بنغيره
ونضيف عليه اثنين
الجته متلزقه
طول النهار ساكتين
والنفخ بقى طبعنا
والريحه مش طايقين
برغم شوف كل ده
لكن كتير صابرين
حامدين على وضعهم
شايفين بأن الاجر
لازم هيبقى اثنين
أصبر تلاقي الصعب
أسهل من الباقين
وكتير كتير حلاليف
فلوس على قلبهم
ماشين على بعضهم
بالجو مش حاسين
ديما بيتكلموا
باللعن مش سايبين
لا ساعدوا حد بجد
ولا سكتوا ع الصابرين
هي المشاعر كدا
انواع لها عايشين
منها بيبقى هوى
رقه في قلب جميل
والتانيه من حظها
تشبه جالوص الطين
وان يوم حبيبك جفا
وكان في ليلة شتا
اجري عليه دفيه
ولو حصل ف الصيف
خليك معاه الونس
زي نسمه في صيف
من بعض لازم تشبعوا
دا العمر أصلا ضيف
التعليقات مغلقة.