من جواز رسمي إلى عُرفي و السبب …
بـ قلمي / أسـمـاء الـبـيـطـار
حكايتنا إنهاردة من الواقع اللي قولنا هنتكلم عنه بكل وضوح و صراحة.
المعاش و إيجابياته و سلبياته .
كلنا عارفين إن اللي بيستفيد بالمعاش بعد رحيل الأب من الأبناء البنات و الصبيان لحد سن معين فقط .
لكن البنات هن الأكثر إنتفاعاً في عدة حالات .
إذا كانت بنت و لم تتزوج يحق لها
أو مطلقة و ليس لها مصدر للدخل
أو أرملة و ليس لها معاش من زوجها
و بيفضل الأب ستر لبناته و هو فوق الأرض و تحتها .
ندخل في موضوعنا ..
جميعنا يعلم أن الحياة صعبة و لكل فترة زمنية صعوبتها على الجميع لكن كانت الحياة بتمشي بالود و الرحمة و التكافل بين الأهل و الجيران و المعارف .
كان ” المليان بيكُب ع الفاضي ” بالبلدي زي ما بنقول .
و الدُنيا كانت بتمشي بالطول و العرض .
لكن من فترة سمعنا عن حالات إنفصال عديدة و السبب صعوبة الحياة و كثرة متطلبات الحياة .
و أحياناً الطمع و نحط تحت الجملة دي عشر خطوط و هنرجع لها بعدين !!
و بتنفصل الزوجة بكل هدوء و راحة لأنها متأكدة أن لها مصدر للدخل و هو معاش أبيها حتى لو الزوج رفض النفقة بتكون إلى حدٍ ما مرتاحة .
و تبقى المشكلة الأكبر و هي أساس حكايتنا ..
و هي محاولات الزوج للعودة لبيته و أبناءه ، و اللي وقتها تقريباً الزوجة بترفض بشدة لأن لها مصدر ثابت للدخل دون عناء و خناق
و و و .
لكن بيحصل و بيتدخل ولاد الحلال من الأهل و غيرهم علشان خاطر الولاد و العِشرة و و و .
و بعد محاولات بتوافق الزوجة على العودة و لكن ” بشرط “
و علشان نكون منصفين الشرط بيكون في الغالب بمباركة الزوج و
بعض من الأهل اللي عاوزين ” يروحوا دماغهم “
و الشرط هو .. العودة و لكن بعقد ” عُرفي “
حتى لا ينقطع المعاش !!
و هنا دخلنا في دايرة تانية و نوع جديد من المشاكل يمكن يكونوا مش عاملين حسابها ؟!
أو مش في حساباتهم من أساسه ؟!
و أسوءها قضايا إثبات النسب ؟!
و شوفنا مشاكل من دي كتير أخدت سنين في المحاكم لعدد من المشاهير .
نرجع لموضوعنا ..
ظاهرة غريبة على مجتمعنا لكنها للأسف موجودة .
و لأنها خطأ قليل جداً من يعرف إنهم عادوا بعقد عرفي .
و عادي الناس بتصحى من النوم تلاقي فلان رجع لفلانه ردها عند المأذون و خلص الموضوع على كدة .
لكن للأسف الحقيقة غير كدة .
رايحين على فين بالأفكار اللي زي دي .
و المشكلة إن في ناس بتبارك و تقلد ؟!
طيب فين القوة اللي بتحمي المجتمع خصوصًا إذا تنصل الزوج تحت أي ضغط نفسي أو حتى مشكلة عادية من طفل قادم ؟!
شكل البيت دا هيبقى عامل إزاي لو إتعرفت حاجة زي دي ؟!
أولادهم أكيد هيكبروا .
هيستوعبوا أمر زي دا إزاي ؟!
لو الولاد كبرت و إستصغرت الأمر أيا كان عددهم و فكروا ينشروا فكر زي دا بين أصدقائهم ؟!
و السؤال
أين الجهات الرسمية من أمور مثل هذه لها تأثير سلبي على المجتمع ككل في المستقبل ؟!
و للأسف الناس أصبحت تفكر فيها براحة شديدة ما دامت الأمور بعيدة عن ” السجلات الحكومية ” ؟!
لكن أين حق المجتمع ؟
حقيقي مشكلة من القنابل الموقوتة إن لم نأخذها بعين الإعتبار .
و إلى لقاءٍ أخر مع حكاوي سمسمة ..
التعليقات مغلقة.