حبة وطن على حبة شعر ،حبة لوم على حبة عشق
من ديوان ( بعرض الكون )
بكري جابر
يا شرياني
و بيعاني
و فرشالي عيون القلب بالحِنه و بالريحان
يا ميت جنه
يا نهر حنان
بقيت عاشق ل إنساني
و ب انساني …
و ب افرح لما ب القاني
ف وش الريح على كفِك
و ب اتسحّر مع الحرافيش بكام غنوه
وكام موال
عشان نعرف نصلي لك ولو ركعه
ف حجر الموت
يموووت الموت على سجادة العشاق
ولا يقدر ….
وميييين يقدر
وانا وانت بنفرش سبحتي قلبي علي قلبك
وب نبعتر حدود جسمي علي جسمك
شجر جميز
بيرسمني علي جناحك ولد عاشق
ف نن عيون سما سابعه
وياااااا سامعه خطاوي الناس ف قلب الحاره بتنادي
وبتلاغي
و بتبخر تراب الخطوه بالموال
عشان ترمي ولو نظره
ولو بالزور
كفااايه نزور ف كعبة بتطرد العشاق
وتسرق مننا البركة
ويا بركة حسن و حُسين
يا سر الله ف تكويني
كفايه هروب
و سور ورا سور
و صد ف صد
كرهت معاك ندا قلبي
وكلمة حب
لكني ب احب ….!!
ومش لاقي غير التجريح و كاس فاضي
بنسكر بيه انا و انتي
عشان نعرف نصون الود
و آآآآآآآآآآآه م الود
و انا العارف بأن الحب سيف ماضي
و رباني
و شئ عادي أبوس إيدك مع رجلك
و اعيش مجنون
لكني ب اموت
و انا داير علي خَلقِك برشرش دمعتي سقا
و ارش السور
بأحلام الهوى عُذري
ومن عذري
ب امد الإيد علي بابك
وب اتسول رغيف الود
و انا المكتوب ف عنوانك:
أصد الريح
و اكون السد
و اكون الشال علي اكتافك
يحوش البرد
وآآآآآآآآه م البرد ف ضلوعي
و انا العريان
ومش شايف … ف قلب طابور من العميان
وب اتحايل علي قلبِك
يخبيني من الغربه
وسوس الأرض
ف حِنيِّ عليّا و ارويني
و خبيني
ولمي الناس من الغربه
وم الترحال في ليلة حب
التعليقات مغلقة.