من فات قديمه تاه بقلم زين ممدوح
ما أن رأى الناس سيارة الإسعاف تقف فى فى الحارة حتى التفوا حولها لينظروا ما الخبر.
أخذتهم الصدمه حينما شاهدوا الحاج مدبولي بجسده الهزيل ملقى على سرير الإسعاف
أحد الجيران يقول أنه سمع الست حرمه وهى تهرول خلفه كان لازم تاكل بيتزا يا حاج !.
ربنا يجيب العواقب سليمة هكذا قال الشيخ رشدى
ودى حاجه وحشه يا شيخ رشدى؟!
لا أبدا بس دى حاجات مش واخدين عليها
لازم الواحد مننا لما يآكل الحاجات الغربية دى
يعمل تحاليل ولا حتى اختبار !
صح عندك حق .
أنا سمعت إن حد من الشارع اللى ورانا شرب بتاع البحر ده اسمها إيه دى مرقة سى فود فحصلت له اغماءه!
مرقة سى فود إيه يا واد عبيط انت
اسمها شربة سى فود !
هو فيه فرق بين المرقة والشوربة يا عم الشيخ ؟
ايوه طبعا المرقة دى بتاع ستى وستك
سى فود دى لما تشربها ما يجيلكش برد عشر سنين!
الله يا عم الشيخ طب ما يجبوهالنا ع التموين بدل الزيت اللى هرى جتتنا ده ؟!
ضحكتنى يا وله انت عايزهم يجيبوا لنا سى فود ؟
ناقص تقول وماله لما يجيبوا كنتاكى هو احنا شوية ولا احنا شوية !
إحنا اخرنا شوية عيش على شوية سكر وفرق العيش اللى طالعين بيه ف السما.
والحاج مدبولي أنا نصحته وقولت له بلاش يا حاج الكلام ده
إحنا معدتنا خدت على الفول مفيش فايدة !
التعليقات مغلقة.