من مذكرات تلميذ ” درس الشيخ طمان” …معوض حلمي
فاكره درس الشيخ طمان
اللي كان وسط الغيطان
لما كنا نروحه رمح
كان مهاود في المعامله
كان بياخد كيله كامله
كيله رز وكيله قمح
بعد مايهرينا ضرب
بعد مايغنينا شرح
كان مسوي وع المعاش
فاكره مريلتي القماش
و الطابور الصبح بدري
واحنا رافعين الرايات
والأغاني … للسادات
( عاش اللي قال للرجال)
فاكره بارليف والقنال
لما قالوا مفيش محال
فاكره جورن الواد هلال
لما مال الضل زانه
والجمال جايبه الدره
واحنا بنملص كيزانه
والنوايا …… مخضره
فاكره وسط الدار يابت
فاكره خير المندره
…………………………
بقلمي الفلاح الفصيح
معوض حلمي
منشأة بطاش
تمي الأمديد
دقهلية
التعليقات مغلقة.