من ناحية مشكلة فهي مشكلة
بـ قلمي / أسـمـاء الـبـيـطـار
نتكلم شوية عن الحاجات اللي بتبقى جوانا و كتير بتفرق في
التعامل ، و النيه، و النظرة، و حاجات كتير هنتعرض لها مع بعض
و إحنا بنتكلم .
الأول نعرف هنتكلم عن إيه
هنتكلم عن قلبي،، و قلبك
عن جوايا و جواك
عن نظرتي و نظرتك للناس
بنسمع ديماً ناس تقول : أبداً لا يمكن فلان يعمل كده، أو يحصل منه كده دا و إحنا بنسمع مُجرد حكاية !
و حتى لو إحنا شخصياً اتعرضنا من فلان ده لموقف بايخ !
هنقول مش قصده ،كان في حالة غير طبيعية .
و هي هي الناس إياها اللي فوق دي..
اللي لما بتخرج بتخرج بأمان شديد حتى في أصعب الظروف
ما فيش حاجة إسمها خطف ، ما فيش حرامية ، الدُنيا أمان و الناس زي الفل ، وولاد الحلال كتير و و و .
و ناس تانية ماشية .. عنيها في وسط راسها
بنتظر للناس جميعاً على إنهم حرامية ، أو هيخطفوها ، كدابين ،
وحشين ، خاينين ، و مالهمش أمان و و و .
أكيد كلنا شوفنا ناس من النوعين دوول،، و إحنا طبعاً منهم .
أكيد لازم نبقى منهم ما إحنا كمان بشر .
النوعين دوول من الناس ، و بالذات النوع الأول ده
إما فطرته سليمة و نقية جداً جداً و حافظ عليها و حط تحت حافظ عليها دي و في الزمن ده مية خط .
و إما أن غرسه و تربيته صحيحة و سليمة جداً
و صدقوني و عن يقين النوع ده من الناس ماشي فعلاً في أمان الله لأن حقيقي هو إنسان نقي و شفاف جداً .
و الأجمل إنه شايف الناس كلها كده !
و يمكن دا أكتر إنسان معرض للمشاكل ،، معرض للتحذيرات ،، معرض للإتهام بالطيبة الزايدة عن اللزوم !
و يمكن دي المشكلة .
أما النوع التاني من الناس فهو اصلاً من البداية مشكلة .
و مش هقدر أقول إن فطرته مش نقية أو سوية لإننا جميعاً بنتولد على فطرة واحدة .
لكن اللي أقدر أقوله إنها مشكلة غرس ، مشكلة ترك ، مشكلة نظرة أتربت جواه و للأسف نماها بإتجاهاته
يعني مثلاً .. لو الإنسان ده عفواً حرامي هيبقى مفكر الناس كلها بتسرق زيه ،، حسود يبقى الناس كلها بتحسد زيه و المصيبة إنه بيخاف !!
ما علينا
أناني .. الناس كلها كده
طلع واحد من العمل بمكيده ،، هيبقى مفكر إن زملائه كلهم في العمل بيفكروا بنفس طريقته !
و حقيقي مشكلة إن نظرته تبقى سوداويه كده طول عمره و ديماً مقدر السوء في أي إنسان مهما كان .
نظرته مرضية .. دي بقى أكيد مش جايز .
أكيد ربنا يعافينا من النظرة دي لأنها حقيقي بتقضي على الإنسان
بتقضي علي علاقاته مهما كانت قريبة حقيقي الناس بتبعد عنهم .
و حقيقي الأتنين مشكلة و إن كان النوع الأول من الناس ربنا بيسلم معاه لأنه حقيقي نقي و فطرته سليمة رغم كل المشاكل التي يتعرض لها .
التعليقات مغلقة.