من وحي الصورة ….خالد الشيشيني

بَبُص بعيني ع الذكرى
لقيت الذكرى شايفاني
بتتبسم…….
وتندهلي
ف رُحت معاها ف ثواني
وقبل ما تبعد الفكره
لقيت البسمة مالياني
قالت لي بالعيون كلمة
مقلتش ليها ولا كلمة
قالت لي عيدها من تاني

أعيد لِك إيه يا جِنِّيَّه
يا عايشه بالحنين فِيَّه
ورايحه وجايّه حواليَّه
كإنك توهه لابساني

ومين يقدر على النسيان
وماليه الذكرى كل مكان
وأنا العاشق وأنا الإنسان
بحب بروحي وكياني
ببص بعيني ع الذكرى
لقيت الذكرى شايفاني

                    ******     

صحيح الدنيا واخدانا
ولهيانا ف زحمتها
وسارقة الضحكة من روحنا
وروحنا تحت رحمتها
ولكن كل ده بيروح
ف لحظة تحن فيها الروح
وألاقي الفرحة واخداني

وأشوف الماضي بخيالي
كإنه من جديد جالي
مع الذكرى اللي شايفاني

ببص بعيني ع الذكرى

لقيت الذكرى شايفاني