مواطن مصري …شعر اشرف الشناوي -شاعر عاميه
البرامون المنصوره
كان نفسي
يكون لي شاليه عالبحر
ياامي
اقعد وامدد رجلي
في قلب الميه
والموج بيزغرط
ويضحك ويجري عليا
وبتاع الترمس
اخد منه شويه
واكلم عم البحر
واقوله حكايتي
واتاريه كان حلم
صحيت على أول مشهد
منه نهايتي
وعقارب ساعتي بتزعق
حاسبه اليوم بالسنتي
واتعلق تاني
وادور في الساقيه واغني
واسقي الفدادين
وازرع بساتين وبشوق
وحنين من دمي
كان نفسي يكون لي
شاليه عالبحر ياامي
طب بس الشمس
هاتحرق مين قولي غيري
والليل على مين يتسلى
بكل أوامره الميري
طب مين هيجاوب
بعد الشفوي كمان تحريري
غير قلبي الواقف
جوا كماينك
يمكن مره تغيري
وتحسي بان ملامحي
القمحي ماهش وبايدي
بكفايه مناهده
التوته اهي شاهده
باني مواطن مصري
منيش بلجيكي…………….
التعليقات مغلقة، ولكن تركبكس وبينغبكس مفتوحة.