موقف من الغُربة بـ قلم أسـمـاء الـبـيـطـار
أكيد زي ما إتعودنا في أغلب مقالاتنا بقول ديماً تجربة شخصية لأنها أقرب إلى الصدق وواقع أنا بنفسي عشته فهقدر أحكي تفاصيله .
المهم زي ما انتم عارفين إني كنت مسافرة برة مصر ما يقرب من سبعة عشر عام بحكم عمل زوجي كطبيب في سلطنة عُمان و يمكن أول مرة أذكر إسم الدولة .
و أشهد إنها بلد طيبة بكل ما فيها
إلا .. و نحط تحت إلا دي ألف خط لأن من هنا هيبدأ مقالنا أو موقفنا، إللي المفروض نحكي عنه .
أكيد الفترة اللي قعدتها هناك مش بسيطة ، إنك تتعرف على سمات شعب ، و تاخد عنه فكرة .
و الفكرة ..
إن النزعة القبلية في دول الخليج دون إستثناء شديدة جداً جداً و لكنها درجات .
نعم درجات في دول شعبها و من دونهم عفواً ” عبيد ”
و حتى هناك الشعب داخلياً للأسف يقسم إلى عفواً أسياد و عبيد .
هكذا هم بينهم حتى و بين أنفسهم .
المهم ندخل في موضوعنا علشان ما نتوهش من بعض
معروف إن أبناء المصريين أو لنكون أكثر دقة إن معظم أبناء المصريين متفوقين دراسياً على أبناء البلد أياً كانت .
و دي كانت بتبقى نقطة غيرة بين الأولاد في المدرسة .
و قيلت لإبني الكبير بكل صراحة من ولد معه في الصف
” إنت إيه اللي جايبك تتعلم في بلدنا ”
كان إبني وقتها في الصف الأول الإعدادي خبرته محدودة و لم يستطيع الرد .
أخذت الكلمة في نفسي ، و لكنني لم أتحرك إلا عندما قيلت نفس الجملة لإبني الثاني و كان في الصف الثالث الإبتدائي وقتها !! ؟؟
من طالب معه في الصف .
فستأذنت زوجي أن أذهب إلى مدرسة عبد الرحمن ابنى الأصغر، لمقابلة المشرفة على الصف أولا ، و قبل أن أذهب إلى مديرة المدرسة ، فلابد أن تأتي العملية بالتدريج و من طبعي ألا اصعد الأمور من أولها .
المهم ذهبت و جلست معها و شرحت لها الوضع بكل هدوء و إن مثل هذه الأمور تؤثر سلبياً على نفسية ابنى خصوصًا إنه متفوق .
بصراحة تفهمت الأمر و طلبت الولد كي يُطيب خاطر عبد الرحمن .
و لكني طلبت منها أن أتحدث مع الولد أمامها فرحبت .
و بكل هدوء .. سلمت على الولد و قولت له نحن نتعلم عندكم
كي نعالج مرضاكم لإن عندنا أطباء .
نحن نتعلم عندكم لإن عندنا مهندسين تبني لكم المنازل
نحن نتعلم عندكم لإن عندنا معلمين ، يُعلموكم كي يخرج من عندك
أطباء و مهندسين و مدرسين و إلى أن يصير عندكم هذه الكوادر تأكد إننا لن نتعلم عندكم .
إبتسمت مُشرفة الصف و فهمت الرسالة جيداً .
و حقيقي من وقتها لم يشتكي إبني من شئ يضايقه في المدرسة .
الناس اللي فاهمة الغُربة غلط و إنك رايح علشان عفواً تاخد ، أنت كمان بتدي ، و بتدي بقلب و إخلاص و يمكن أكتر من أهل البلد نفسها .
حضرتك بتشتغل في مهنة أو وظيفة ، هما لسه بدري عليهم علشان يدرسوها أو يتعلموها .
هما اللي بيطلبوك بيطلبوا مؤهلك ودرجتك فلازم تبقى مُعزز مُكرم .
الناس اللي فاهمة الغُربة إنك لازم تدوس على نفسك و عفواً توطي بنفسك علشان رزقك و أكل عيشك .
أحب أقولك إن محدش بيقطع رزق حد إلا بإذن الله .
لكن إللي أعرفه إن الإنسان ليه كرامة واحدة و أبدا ما يسمح لحد مين ما كان إنه يدوس عليها تحت أي سبب .
عندي إيمان و قناعة كاملة إن الإنسان لابد أن يكون سيد نفسه
أن يكون الإنسان على يقين كامل إنه يُعامل إنسان مثله تماماً لا يزيد عليه أو يقل عنه في شئ .
صحيح الضوابط موجودة و لكنه لا يسمح أبداً بالتجاوز في حقه كإنسان و بني آدم له حقوق إنسانية .
حقيقي لو مقدرتش تصون كرامة نفسك بنفسك ما حدش هيقدر يصونها لك و إن كانت دولة بأكملها .
المال خُلق لقضاء الحوائج و سدها و سعادة النفس
و ليس ليجعلنا أسياد و عبيد .
أتمنى أن تكون رسالتي وصلت و فهمنا الغرض من غُربتنا .
ساعات كتير الحقيقة بتوجع لكنها كلمة حق لابد أن تُقال .
التعليقات مغلقة.