ميت علامة…شعر وحيد علي الجمال
اجمعي كل اللي بينا
واضربيهم في تلاته
واحسبي العمر اللي فاضل
عدا منه قد ايه
واطرحي زمن المناضلة
والبراءة والطيابة
والسذاجة والتفاهة
مهما كنت عملت إيه
واطرحي سطرين كمان
وقت حزنك وانتظارك
راجعي دفتر فيه حسابنا
حتى لو كنا اتحاسبنا
زودي حَبَّه ف حسابي
ومتعمليش م الحبه قبه
اكتبيلي كل حاجه
حتى لو نفسك في حاجه
واضربي الفرق في تلاته
لو لقيتي حد غيري يشتري
بيعي يالا و بالتلاته
مش هشيل الحمل كله
وارجع اشرب مُر تاني
لسه طعم المر شابط
فوق لساني
مستحيل يوم اقنعك
أن أنا كامل مُكمل
وإن تحت القُبه شيخ
بس انا مش برضُه فاسد
والسلف في الأصل دين
باكتب الشعر المشاكس
رد فعل لكل فعل
نفسي مرة ابقى فاعل
نفسي دمي يبقى ساقع
مش دم حامي
انت محتاجه لحِجَامَه
انت جرحك لسه سايب
جوه قلبي ميت علامه
طب تراهني إن بُعدك
فَسَّر الحلم القديم
لما شوفتك فوق حصاني
جوه كفك ألف عين
كان يادوب الباب هيقفل
كان موارب.. وافتكرتك
لما غموا عينيا كُنا
كنا لسه صغيرين
كنت فاكر إن قلبك هيروادني
لاجل ابقى لك حياتك
بس صوت الفجر خَدني
تَنُّه ماسك طرف ودني
صحىٰ أمي والحنين
شقشق الصبح المسافر
جوه قلب الطيبين
تخبز الليل بالعجين
كات تِقَلِب فيه وتدعي
فرقَعِت يجي ألف عين
تَمْتِمِت وبألف دعوة
إني أبقى مستقيم
بس لما رجِعْت تاني
ارسم الحلم اليتيم
جه خيالها في النهاية
اوعى يابني تقول آمين
وحيد علي الجمال سرس الليان محافظة المنوفية جمهورية مصر العربية
التعليقات مغلقة.