ناس وِحشينْ بقلم حبيبة سلام
أيّوَه في ناس بِتْموت في البُعد
وتحِب تموِّت ناس تانيينْ
وكمان بتحِب
تعيش الجرْح فْ
عِزِّ الفرْح
وبتقتِل فرْح البني آدمينْ
تِعرَف دول مين؟
دول ناس مِش ناسْ!
في الكِذب أساتذة و في التمثيلْ
لو يوم بَصّيت.. هتلاقي عليهم ألف دَليلْ
بَسّ اِنت بتِعرَف وِتطنِّشْ
وبتِعمل روحَكْ مِش شّايفْ
عارِف ليه؟
علشان خايف تِصدِم روحَكْ
وتْتَوِّه روحَك مِن روحَكْ
ويطول نوحَكْ
فَبتِعمل روحَك مِش شَّايفْ
وتكمِّل بيهُم مِّشوارَكْ
ماشيين جارَكْ
لكِن اِوعاك يوم تِأمَنْهمْ
أو تِكشِف ليهم أسْرارَكْ
وِاوعاك تِزعَل لّو يوم جَرَحوكْ
ولا تِندَم أبداً لو خدَعوكْ
دول ناس قاسيينْ
مِش بني آدمينْ
فبألْف سلامَة انْ يوم فارقوكْ..
التعليقات مغلقة.