نص شَربة هم بقلم شيماء عادل

غمز بروحك نص شربة هم
وسيب الباقي مداري
يجوز جراح الوهم يوم تتلم
او ينحني عمرك
نصين آخرهم قسمة والمكتوب
وعيون بتلمح فرحنا بيدوب
ك سمار بهية وقت وقفتها علي الرملة
بتحضن حفنة م الاحلام علي مدد الأحبة سنين
وتتلاقي ف وقت أما العيون تسرح مع المواويل
بتبني فوق كتاف الحظ
رصيف م الجنة ما بيكملش
وساعة شوق بترمي علي السنين اللوم
ف وقت أما العيون تحضن بواقي من نعيم زايف
بكون خايف
ف وقت المطرة لو تنزل بدون أعذار
نص الوعد
بداية من لقا الأرواح
وفرحة حالفة تتغمس مع الأيام
بمطرة روحنا وقت أما الوجع يتشد
حبال دأبت ودمع عنينا ما لحمش الأنين ف الروح
وادينا بنجري ف الزحمة
وروحنا تروح
لنص وعد متبقي
وحلم بات مع الاموات
يجوز نلقي البواقي هناك
نمد عيونا علي آخر بواقي الشوف
يصبح وعدنا قسمة وبات مغلوب