نظرة عينيكِ في ترحالي…بقلم سيد جعيتم
نظرة عينيكِ في ترحالي مصاحباني
مهي زادي وزوادي
وراس مالي
ونور الصبح في عتابك
مفيش زيه في أي مكان
علي بابك أنا مصلوب
ولا قابل أكون أيوب
عشان خاطرك أنا غالب
ومش مغلوب
وروحي مكلبشة فيكي
في طين أرضك أنا مغروز
ما أنا نبتة تصون عرضك
وليل ونهار أنا زنهار
على بابك ما بنمشي
نبيذ نخلك في عرقه أدوب
يسكرني وعنه ما أتوب
يا دوب شربة تشبعني
مهي خمرك حلال في حلال
وخمر الغربة يوهمني
يتوهني يوقعني على وشي
ويرميني في قلبي الخوف
أقوم مكسوف
وأقول ياحيطه داريني
مهي خمره حرام في حرام
في الغربة كتير بحكي
عن العصاري قصاد نيلك
وحضن قلبك الدافي
و سهري في نور قمرك
و ضمة بوح قناديلك
وبدعيلك مواويلك
تطرح ضفاير لست الحسن
وسنابل خضر وتندهلي
تعالى يا واد
أعود تاني واتمرمغ
في قلب تراب حواريكي
وأكون مسمار تدقيني
في عرق ضلوع سواقيكي
وألف حكاية وحكاية
وسلايه وانا جنبك
كوباية الشاي تلات تدوار
وكل دور اتقل من التاني
خُطايا يبقى لها عنوان
يا أمي اشتاق تضميني
في الغربة أنا عريان
وفين إيدك تغطيني
وسنين عمري
فوق ضهري تقال
وذنبي يا بلدي تانيني
وفي الغربة أنا سواح
ومين جنبي يواسيني
أنا راجع على حدودك
أعسكر تاني وسلاحي
في إيدي كتاب بيحميكي
التعليقات مغلقة.