نظره يا أهل الهوى بقلم.صفوت راتب
ولا كل واحد كتب
فى الحب أبدع فيه
بس اللى قلبه اتوجع
حسِّت قلوبنا بيه
سابى القلوب والنظر
لعيونه سلِّمنا
وبيعشقوك يا قمر
واتعلِّموا منا
ويا قلبى مين يحتمل
لو ربع أوجاعك
اللى بعمرى شاريه
فى ثانيتين باعك
تشكى،ومين يسمعك
وبعيد عن السامعين
يا قلبى فين يوجعك ..؟
والقسوه م الغاليين
لو كان يفيد البعاد
أمشى الدروب أميال
سفرى هواك والزاد
أشواقى فى الترحال
حالى وحال الناس
فى الحب أعجب حال
حبى وفا وإخلاص
والهجر منهم طال
نظره يا أهل الهوى
داب قلبى من نظره
والصبر قالوا دوا
دقت الكاسات مُرّه
بحر الحنين فى القلب
بحر الغرام ف عنيك
يجذبنى حبك جذب
وتصدنى بإيديك
#صفوت راتب
التعليقات مغلقة.