نغم العود بقلم .. مصباح أبو حماد

نغم العود، في الملكوت،
صدى الأشجان. عالم تاني…
ياهمس الروح، ولمّا يبوح
فيها الصمت أشجانــي…
أسيب روحي لأنغامك،
لأحلامك،،، لوجدانـــي…
أنسي إن أنا عايش
ولا المعايش هماني…
أسبح في فضا الأكوان
أغزل م السحاب ألحان
ولو لسه القليب عطشان
أقول له.. ياعود من تاني…

رناتك، ونغماتك،
وليل الأنس في جنابك…
وشوق الحلوة العشقانة
الهيمانة بألحانك…
وفارس جاي هاياخدها
يدللها على حصانك…

يانغم العود، ياأحلى وعود
يا همس القلب الورداني..
ياسحر الليل، في حضن الليل
يا أبو المقام السلطاني…
الفن عليل، وبيشكي الويل،
يرحم زمانك وزماني