نفسي اتعلم …
أحمد فؤاد الهادي
نفسي اتعلم (شعر غنائي)
ــــــــــــــــــــــــــــــــــــــــــــــــــــــــــ
انا مش فاهم ..نفسى اتعلم
اسكت يعنى وللا اتكلم
لما اتكلم ماترديش
حتى سكوتى ماريحنيش
بس انا صابر مش راح اسلم
مانا مش فاهم ..نفسى اتعلم
اسكت يعنى وللا اتكلم
…..
ورد الدنيا من حواليكى
كله منور فرحان بيكى
غنوة جميلة بيغنيكى
احلى مافيكى سحر عنيكى
وانا مستنى تسألى عنى
تردى عليا الله يخليكى
ليه تسيبيتى اسهر واتألم
انا مش فاهم ..نفسى اتعلم
اسكت يعنى وللا اتكلم
…….
سامع قلبك بيقول ايه
وانا مش قادر اخبى عليه
بيكلمنى رغم سكوتك
وانا كان نفسى اسمعها بصوتك
بتبصيلى ولاترديش
حتى سكوتى ماريحنيش
وبقيت ساكت وانا باتكلم
مانا مش فاهم ..نفسى اتعلم
اسكت يعنى وللا اتكلم
ـــــــــــــــــــــــــــــــــ
أحمد فؤاد الهادى – مصر
التعليقات مغلقة.