نقطة فاصلة في القضية …بقلم الشاعر مدحت رياض
في اللي حاصل واللي جاري
فيه اللي بايع واللي ضايع
واللي كان في الاصل شاري
اتفاقك يوم معايا أو خلافك
هي هي
موش هجادل أو هجامل
احفظ الجملة اللي جاية
(غزة موش كل القضية )
فكرة أصلا صهيونية
ينضرب مربوط في غزة
يبقى خايف برة منها
الف سايب
فكرهم في الاصل خايب
غزة في عيون الاعادي
صيدة سهلة وشعب دايب
بس وحياة اللي راحوا
بكرة تطلع منها تايب
لعنة الأرض اللي شالت
شعب بالحرية طالب
موش هترضى تدوس عليها
ولا تمحي في يوم ماضيها
غزة ضحت بالغوالي
والدموع غطت عينيها
كل نقطة دم سالت
غصب عنك وبايديها
ع الجميع لازم تحاسب
التمن هيكون وجودك
تنمسح من الكون حدودك
تنفتح يومها القضية
ليك وللي مطاطي راسه
واللي بايع دم ناسه
واللي كان دايما أساسه
غزة تفضل وحدانية
غزة عرت كل متغطي بندالة
غزة خلقت في القلوب
والخلق حالة
عمركوش شفتوا اللي كفن
إبنه وبيرفض حداد
واللي دفعت للشهادة
ابنها وسط الولاد
واللي رغم القصف واقف
نسر بيلملم جراحه
واللي فوق دبابته خايف
تسلم البطن اللي شالت
اللي باقيين واللي راحوا
هي دي غزة الأبية
هي دي رمز الكرامة
واقفة وبتحمي القضية
نفسي أكتب عنها دايما
الف قصة والف حالة
بس مهما الشعر يحكي
فإنه يوصفها استحالة
غزة يا أرض الكرامة
أقبلي اسفي ودعايا
يوم حسابي تكوني حاضرة
واشهدي بينهم معايا
ان همي نفس همك
وان جوة القلب فيا
هو هو نفس دمك
شوف يا صاحبي
فاختلافك واتفاقي
النتيجة هي هي
بكرة هيجيلك كلامي
فكرة اصلا صهونية
غزة دي اصلا بداية
غزة موش كل القضية
التعليقات مغلقة.