نورك ياحبيبتي ….معوض حلمي
أنا قلبي مات م العطش بينادي ع الساقي
والخوف معشش جوا قعر البير
طرح السنابل نشف والروح شراقي
ونورك حبيبتي انطفى جوا الليالي آسير
وانا نفسي يبقى كل عزمي سواقي
وافتح عينيكي المشتاقين للضي
وارويها لاجل تشوف
فاتشوفني لابس كفن
وتشمي ريحة العفن
وتصحي اللي اندفن من روحي
مانتي اللي سرقتي سكوتي من بوحي
كانك القاضي وحكمه سيف بتار
طب ليه قالولي حبيبتك والحب إلزامي
والمعده عايزه المم وباشد في حزامي
رموني ليه في الخلا وكأني من جانك
تايه بادور عليكي وف إيدي عنوانك
وجيت لبابك عفي ومنعني سجانك
رميت الندر ياحبيبتي ودعوتي تحني
لو حتى تاخدي الروح من دمي تتحني
مانتي الجمال اللي اتوصف بالنور
وانا الحبيب اللي اتوصف مسحور
محتاج رضا السجان ساعة صفا ويحن
واحس حبة دفا تلاقيني زي الجن
واديكي نبضي يمد في وريدك
يحيي الامل ويمحي تنهيدك
ويعيد لعيدك بهاه
وان كان على الألم اللي نايم في الصدور
والخوف اللي عشش فوق سطوح الدور
بالحب نقدر ياحبيبتي نبدله ونعيش حياه
ونعيش معاني الحب ونساعها
نهرب معاها ونجري في وسعها
نفتح بيبان الفرح / دا الفرح جاه
ونطير سوا ونحاجي ع الحلم اللي باقي
وأنا لسه قلبي بينادي ع الساقي
خدني لطريقك هوا زاد إشتيافي
عهدي لعهدك دوا شادد وثاقي
ليوم التلاقي الحلم فتح الباب
والآقيه في ساعة رضا واطفي أشواقي
اشوف خيوط النور والفجر جاي شقشقه
وارجع كدا مجبور ويزول كمان الشقى
ونقيم لنا دستور يحلو بيه اللقى
وتعمى عين الحسود تروح وتنسانا
يمكن يكون البعد نسانا…؟
وانتي الحبيبه العايقه في الطله
وانا لسه قلبي بيزرعك ضله
يطرح عشانك 300 فله
يمكن تميل فله وتنام على نهدك
آسقيكي م القله تسقيني من شهدك
وتقولي نفرح بقى ونلعن الذله
وابنيلك ع السطوح برجين حمام
ماانتي اللي طارحه الهيام
وانتي اللي عشقك نام
في الروح والنني
والدمع سال مني
بالوحي / والإلهام
………………………………………
بقلمي الفلاح الفصيح
معوض حلمي
منشأة بطاش
تمي الأمديد
دقهلية
التعليقات مغلقة.