نيوتيرن الاحلام بقلم.اشرف الشناوى
ليه وشك مليان تجاعيد
ومكشر دايما يابعيد
مش عارف تفرح حبه
وتزق الحزن دا زقه
او تخطف ضحكه
من الكواليس
او تهرب حبه
من الكوابيس
مش عارف تمشى
فى وسط الناس
تدفن فى ضميرك
وتشيل من جواك الإحساس
مش عاوز يعنى تعيش
والا هتفضل كدا درويش
أفرد وشك من دى الكراميش
واغسل روحك م الوجع البايت
روحك شاخت جواك
قلبك عجز وياك
افتح شبابيك الضلمه
هيخش النور
وهيغسل كل حيطانك
وهيرسم احلامك من تانى
وتحس بروحك طايره
مع العصافير
اضحك لو حتى جراحك
زى الدبابير
مش كل السنه امشير
صدقنى مش فارقه كتير
العمر بيجرى
ان كنت بتضحك
او ميت تكشير
اعمل نيوتيرن لاحلامك
او حتى كاشير
كمل لو صعبه المشاوير
واضحك . الضحكه
الكود للتشفير
وهتفتح كل القنوات
وتعيش الباقى فى عمرك
فى سلام
ياسلام لو فكيت التكشيره
ياسلام
هاتحس براحه كبيره
……وتنام
التعليقات مغلقة.