هتعجزي بدري بدري
أسـمـاء الـبـيـطـار
كتير مننا بينسي نفسه في زحمة الحياة أو بمعنى ادق بيتجاهل نفسه كأنسان ليه نِفس حتى
تحت اي مسمى بقى مش فارقة
أم ،، الولاد أولى ،، مش هتفرق اي حاجة و خلاص ،، ما خلاص بقى هناخد زمنا و زمن غيرنا ،، ،، ،،
و غيره من الكلام ده اللي اكيد مر علي سَمع اي حد فينا .
لحد ما حد عاقل كده يقولك يا بنتي انتي عندك كام سنة للي بتقوليه ده
مش هتصدقي لو اقولك تجاهل النفس بيبدأ بأكله بتحبيها آه و الله
انتي بتحبي مثلاً السلطة عليها شبت هما مش بيحبوها تروحي شيلاه و اهو كله اكل و خلاص هتبصي تلاقي نفسك
اهو كله شُرب ،، اهو كله لبس ،، اهو كله اهو كله
لحد ما توصلي لمرحلة اهي عيشة و السلام و انتي يا دوب ولادك لسه بتقول يا هادي في الدُنيا يعني عوزين نفسيتك و صحتك قبل أي تضحية .
هتلاقي نفسك في سن مش سنك .
العيل بيكبر و الدنيا بتتغير بسرعة عجيبة و اكيد علشان انتي بني آدم لحم و دم عادي يعني هتقفي فجأة و تبصي حواليكِ هتلاقي نفسك غريبة عن العالم .
و هتدخلي في حِسبة تانيه خالص لما تلاقي كل واحد عايش دُنيته زي ما بيحب بياكل اللي عوزه ،، و ماشي على الموضة ،، و بيخرج يشم نفسه و يغير موده مع اصحابه و و و
نفسك اكيد ليها عليكِ حق
ما حدش هيهتم بيها غيرك
ما حدش هيحبها ادك
ما توصليش بيها لمرحلة الندم على عُمر ضيعتيه لأن الندم
وقتها مش هينفعك بالعكس هيتعبك اكتر .
حبي نفسك علشان تقدري توصلي بأولادك لبر الأمان
لأن طول ما انتي كويسة و نفسيتك طيبة و مرتاحة حتى بأبسط الأشياء هما كمان هتلاقيهم مرتاحين على راحتك
و يا ستي اعتبري نفسك عيل من العيال .
التعليقات مغلقة.