هجنى الاوجاع…
أشرف الشناوي
…………….هجنى الاوجاع……..
هجنى الاوجاع
فى عمرى
حسنى فيا السلاله
واحبسى قلبى
فى حضنك
تهمته هى العماله
واكتبى للكل شكرا
حتى لو اخر الرساله
هجنى الاوجاع فى بكره
لجل مايكون استحاله
طفى شمس الحب فيا
واعملى م القلب غيه
وابدرى جرحك فى عمرى
واعملى نفسك غبيه
واحبسى الفجر اللى طالع
واحفظى يالا القضيه
على سور السجن حبه
واعملى القضبان حديد
زودى الحراس عليا
اصل انا زيك عنيد
لما بكره كرهى بيجرى
زى دمى فى الوريد
مش مهم ازاى نهايتى
ان كنت كافر او شهيد
هجنى الاحزان ودوسى
طفى شمعى
اللى فى فانوسى
زينى بالورد قبرى
واوعى تنسى انك تبوسى
ظبطى ساعة الحساب
اصل انا ساقط حساب
دخلينى فى اى حسبه
ان شالله اكل وللكلاب
شدى روحى من ضلوعى
وابدريها عالسكايك
روحى فالصو مش هتنفع
تعمليها فى يوم سبايك
هزى بالغربال ولاقى
كسرى عضم السواقى
تلقى شوك الارض يطرح
جوا من بطن الشراقى
امتى بطن الارض تحبل
لما يبقى النور فتوه
لما يجى الحلم شايل
كل اشكال النبوه
لما يبقى الفجر طالع
رغم جرحه بكل قوه
قلبى رغم الجرح
حاسس
بالامل بيدق جوا
…………………
اشرف الشناوى
شاعر عاميه
البرامون
المنصوره
التعليقات مغلقة.