هكتب لك إيه ياشعر … بقلم مسعد البحراوي
مبقيتش عارف أسعدك ياشعر
مانا كل فتره بحال
الحزن ياما والفرح لحظه
بين كل لحظه ولحظه
مليون ديوان يتقال
أكتب لك ايه ياشعر ؟!
صدقني .
لا هتهوى حرفي ولا تلقى غير حوارات
الناس بترمي في البحور أزمات
جفت وعبت حزن
جوه القلوب ياشعر
أصبح كده الإنسان ؟!
ولا شيء في حاله في الزمان دا يسر
علشان يخلي الشعر يُكتب له
مبقاش يفكر غير في جلب الشر
ماسك بقوه بإيد شيطان عقله
غرقان قوي ف جهله
بجهله شاف أهله
قطيع من المقاطيع
دايما يكون حله
بيعقد المواضيع
فظيع بشكل مريع
وكمان دا ماشي يبيع
أصله وكاره شكله
ياشعر اكتب اْيه
هيبة الوطن بتيضيع
من فعلي مع فعله
فتحنا باب الفهلوه
ما قدرنا على سده
فبقينا كلنا في الهوا
كلْ كف على خده
راح اكتب ايه ياشعر
عايزني أكتب اييييه ؟
أغاني أم مواويل ؟
عاميه وله فصيح ؟
أوصف جمال الليل ؟
واركب بساط الريح ؟
واجيب لعبله الخيل ؟
والنوق وعيلة الفيل ؟
واعيش معاك في خيال ؟
واسكن في حضن النيل ؟
بكفايه سهر الليل
علي ضفافك ياشعر
والدنيا لا هي حساك
ولا فاهمه إيه معانيك
دايسه عليك
وفاتحه الحضن للجهال
ومبدله الاحوال ..
لا الحب عاد موجود
ولا حد عاد راضي
الكل ماضي لماضي
وماضي على ماضي
بعنا الأراضي واشترينا هدوم
تستر فعرتنا
خليتنا ناس غيرنا
خيرنا.
بينا بقى مهضوم
ولا فيش حساب لليوم
اللي ف ميعاد معلوم
أكتب لك إيه ياشعر
وانا جوفي بقى فاضي
أنا اللي حاكم وقاضي
حكموا اني اكون عايش
(فاضي ومش فاضي
فاضي من الأفراح م الحزن مش فاضي )
هكتب لك ايه ياشعر
التعليقات مغلقة.