هل تعلم قوانين السلامة بالطائرة الشبيهه بكورونا
بـ قلمي / أسـمـاء الـبـيـطـار
نبدأ بتجارب حياتية بسيطة كده و بعدين ندخل في موضوعنا كـ العادة .
أول تجربة ..
طبعاً عارفين إني كنت مسافرة برة حوالي خمسة عشر عام و تقريباً كنت بركب الطائرة مرتين في السنة ذهاب و إياب .
أول مرة أسافر كأني كنت راكبة عربية كنت عادية جداً و مش خايفة من حاجة مع إني يا دوب كنت بشوفها في السما مش أكتر .
كان زوجي مستغرب مني جداً إني ما عنديش الرهبة من تجربة الحاجة لأول مرة !
و دا شئ مش كويس على فكرة .
و التجربة التانية ..
إني لما جيت مصر و أستقريت قلت أتعلم السواقة المهم نزلت مركز تدريب و أنا عمري ما قعدت على عجلة قيادة .
المدربة قعدت بجانبي و حطيت رجلي على البنزين و طلعت طالعة أمريكاني و دي يعرفها اللي أتعلم السواقة و اتقنها .
لقتها بتقولي انتي سوقتي عربية قبل كده ؟!
قولتلها لأه .. بس كنت قاعدة جنب زوجي أربعة عشر عام و هو بيسوق و طبعاً كان بيعلمني بالكلام عن الحركات و النقل و حاجات كتير تانية .
يعني متعلمة الحركات بالنظر و بطول الفترة .
قالتلي طيب بلاش الطالعة الأمريكاني دي و كان أمر .
ندخل بقى في موضوعنا ..
من أشد قوانين السلامة في الطائرة و أكثرها أنانية في حالة الطوارئ القصوى إنك تنقذ نفسك اولاً قبل حتى إبنك اللي جنبك علشان يبقى فيك حيل تنفذه بعد كده .
يعني إيه ..
يعني في حالة الهبوط الإضراري أو المطبات الهوائية الشديدة في ماسكات أكسجين بتنزل لازم أنت تاخد أكسجين الأول و بعدين تديه لإبنك أو إللي جنبك هو كده قانون السلامة
أنقذ نفسك اولاً
إحمي روحك أولاً
فهمنا المقصود .. يعني لما تحمي نفسك هتقدر تساعد اللي جنبك
و تحميه و تنفذه و أنت فايق مش تروح أنت و هو .
زي اللي إحنا فيه دلوقتي ده و وباء كورونا المطلوب حضرتك إنك تحمي نفسك الأول علشان تقدر تحمي اللي حواليك .
و تحافظ عليهم و على صحتهم و هيوصل الأمر إنك هتحافظ على أرواحهم بالذات لو عندك كبار سن أو أمراض مزمنة و أظن مافيش بيت بيخلوا من الأتنين .
يعني حضرتك مسئول مباشر عن الناس دي .
و تخيل إن دا دور كل واحد فينا لازم نحافظ على نفسنا علشان إحنا سلسلة أو سبحة مربوطين في بعض .
و على فكرة أنا ما فضلتش زي ما كنت أول مرة أركب فيها الطائرة
لييييه ؟!
لأني أدركت خطورتها و كنت بفضل أتشاهد من أول ما بطلع لحد ما بنزل منها
حقيقي لما بتدرك خطورة الحاجة بتعرف إن ليها قواعد لازم تُحترم .
و لكن الأجمل حقيقي التجربة التانية ..
إنك تتعلم و تاخد فكرة عن أي حاجة بالنظر بقى،، بالسمع ،، بالإهتمام
من باب العلم بالشئ حقيقي كان الأمر سهل جداً و مش متعب لا ليا و لا للمدربة
تخيل إنك بتجرب الحاجة لأول مرة بطريقة عملية لكن فعلياً إنت متمكن منها جداً جداً .
الإشارات ،، المسافات بينك و بين اللي قدامك و اللي وراك .
يعني دووب تبقى في الموقف هتلاقي نفسك بتتعامل بكل سهولة و يُسر و هتحس إنك مرتاح لإن عندك فكرة ، عندك وعي ،، أتعلمت
وعيك حلو و حط تحت وعيك دي مية خط .
حقيقي لو ما اتعلمناش من اللي حواليا يبقى العيب فينا .
العيب فينا لو مش مقدرين خطورة الأمر اللي إحنا فيه
العيب فينا لو ما إستجبناش للتعليمات بكل تعسفها إن لزم الأمر .
الأمر مش بسيط و أتمنى إن الفكرة تكون وصلت .
و تمنياتي للجميع بالسلامة .
التعليقات مغلقة.