همس الشمس بقلم جيهان النجار

حروف شعرك
تجرجرني
وتتمحك وتتلكك …. تدلعني ….
قصيدة حب مابين الحرف والمعنى تعلقني اماني… فيك
وريحة البحر ترعشني وتنعشني
لما رفعت خصل شعري
بكف ايديك
وكل الضحك يملكني وانا ماشية كده لوحدي
وبتذكرلك .. نكتة فَيك “Fake”

” دي حتة بت…..
عليها عينين
بتقول ايه!!!
بتبص لمين !؟!
للى رجليها
الاتنين يمين”

وعقد الفل فى رقبتي
يتعهد بالف يمين
يعقد عهد على كفك
يطق عوازلي والليمين
الفل يابيه للست
يابيه….
خد منها ……. ونفعني ربنا يخليك

وهمسك وانت بتندهلي
بيصحي هوي قلبي
واشوفك ضحكة
فرحانة
ف ضى عينيك

وصورتك وانت واقف جنبي كأنك ورثي م الدنيا
وخايفة عليه

*ولما اتكعبل وتسمي
وتسند …
ف دقات قلبي
وتئسم وتتبسم
وأنا مكسوفة
وعاملة فيها بتألم
وروحك فيا بتسلم
يااا روحي عليك

• ياااا بت …ياااا حلوة ياا عبيطة وقعتي ازاى
  دا…. انا شكلي دخلت
  ف حيطة
  شوف …..ازاى

وأجرى … تمد تسبقني وتستنى وانا اتلكع على
مهلي
ولما اشتاق وتشتاقلي
تحضني تدوخني
ونغفل …عيون الناس
يستلف النسيم احساس
ونغمض عيون الشمس
تتحول لنسمة وهمس
و………
يارب اللى جاى أجمل من يومنا ومن الأمس

يا احلى قصيدة كتبتني وحفظتني
وخدتها الدنيا
وخدتنيي
ومن……
يومها ما شفت
نهار طلع له شمس .