هناك ب اضحك بقلم بكرى جابر

هناك ب اضحك بقلم بكرى جابر

لا الأرض دي أرضي
و لا دي البيوت بيتي
و لا بيتكم العالي
ابو الدرج جرانيت
يشبه جريد بيتنا
ابو السعف حواديت
و لا وشيَ اللي انا صُنته
و صاحبتُه طول عمري
لقيتُه في وشوشكم
و لا كنتم الانسان
صحيح … انا بينكم
لكن هناك باضحك
وش السما بيضحك
حتى الفراخ تضحك
و ندحرج الموال
سواقي بتغني
و النخله بتصلي
مرسوم على كُمي
قمح الغناوي بخور
يااااا رمشك المسحور
وقت العصاري ندور
عيال بتتشاقى
حافظين نصوص الود
والغصن مرجيحة
وقت الصلاة رهبان
بنسمَع القرآن
و لشيخنا بنغني …
مولانا …. ياعمي
و نخبَي في الفٓلكهٔ
وندحرج الكورة
ع الترعه سنيورة
بتمسَى ع الغيطان
وتلاغي في الصبيان
قلب العيال حٓرَان
تفاح على رمان
و الدنيا دي عروسه
سلامات ياخلق يا هو …
يا اللي انتو واحشنيَ
واحشنيّ … و معايا
وسط المدنية البور
شوارعها غُلٔ و زور
والضحكة دي صناعي
يا قلبي …
يا صداعي ….
بيقولوا شعر عبيط
و انا شكلي طفل عبيط
مش عارف افهمهم
و لا كنت يوم منهم
والغربه قسَايٓة
قلب المدينة حديد
رغم الوشوش ناعمة
و العيش هنا فينو
لكن ما بيشبعش
إنٔ قولت …. ما ترجَعش
قولها …. و لو هتموت
ما انا من زمان ميت
مش ناقصه اموت عيَل
سٓمٔيِتها انا كرامه
وقالو واد مجنون
شاطر يغني و بس
فالح يحب و بس
شاعر وقال … بيحس …!
يظهر عليه اتمس
خلَوه مع نفسُه
بيصَلي للإنسان
و يمسي ع الأوطان
يملا كاسات الحب
و يصب للغايب
يا قلبي يا دايب
لسه هناك واقف …..
تلميذ و شنطة قماش
وبيكره الحراس
ف مدينة المساخيط
شخابيط على شخابيط
مع كام ديوان سٓكةٔ
يا عم …. ياسقا
خدني معاك اشرب
و اياك هنا تسيبتي
ده انا من زمان عطشان
و الدنيا ما بترويش
يا عم … يا درويش
اقرالي كام فاتحة
فاتحة عشان الحب
فاتحة للغايب
فاتحة ف ساعة الجد
و اللي ملوش نايب
يا قلبي يا دايب
موالي تاه مني
و انا تُهتْ في الحواديت
حدودته ملتوته
عيل و بنوته
فاردين شراع الشوق
بس الوطن قاسي
يا عم …. يا قاسي
بكره العيال تكبر
و ساعتها ح نغني
و ان طال زمان الموت
صدقني … ح نغني