هو أنت ايه؟ بقلم /رضا أبو الغيط
هو انت ايه ؟
لزقة بغرا
وللا ف عيونك يا ألم
حِليت دموع الحنجرة
ارجع ورا
وبلاش تقرب
من قلوب الشقيانين
تحت السما
وآخرس وبطل ثرثرة
ارجع ورا
وكفاية ضحك ونقورة
أملى اللي طارح ف الحياة
بذرة أمان
قادر يحل المعضلة
قادر يلجم حضرتك
ويسد باب المجزرة
وللا انت فاكر هااشكرك
واركع لحبل المشنقة
ولحد سيف المقصلة ؟!
اوعاك تفكر ان انا
علشان بتطاطي للرياح
يبقى خلاص
عزمي انكسر
وللا عشان بسكت ساعات
ع المنكرات
يبقى خلاص صوتي انحشر
انا بس واخد دنيتي على مهلها
يمكن تقولي مين فتح
لجيوش جنابك يا ألم
شباك وباب المندرة
مين اللي طمع خنجرك
يطعن شبابي من ورا
ارجع ورا
وبلاش تصدق كدبتك
انا لسة ساند ع الأمل
وبدوس بصبري ع الوجع
وف كف ايدي الطيبة
كل الحلول .. للمسألة
ارجع ورا
لم الشبك
انا مش سمك
طُعمك هيخدع معدته
ولا حلمي كان عصفور ضعيف
رشك هيقتل فرحته
ويموته
انا حلمى قادر ع الدفاع
انا حلمى مركب له شراع
قادر يفوت وسط الرياح المرعبة
حاسب حساب كل الخطاوي المؤلمة
بالمسطرة والمنقلة
التعليقات مغلقة.