هى بر الأمان بقلم محمد ضباشه
هدهدوها وهننوها
ولبسوها التيجان
وارفعوها فى القلوب
وعطروها بالريحان
ما هى روحنا …
وسر بوحنا …..
ولو فتحت جروحنا
هى بر للأمان
فيها طبعا حتة قاسية
وكام حته لسه عاصية
وحته غيمها كالليالى
لكن قلبها مليان حنان
شوفوا اللى خان
واللى هان عليه ترابها
ما صان حتى اللى كان
وهد بغباوة بابها
راح فين ضميره ؟
وكان أيه مصيره ؟
لما قتل ورد الجناين
والدم يصرخ على الحيطان
فيها عيون كل النسور
سهرانه تغزل حبها
ولو كان كفن …!
ما يكفى شبر فى مهرها
وفيها اللى شرب الصبر
وعاش فى توب أيوب
ولو يترمى فى القبر
ما يتعرى عنها التوب
صاين فى قلبه عرضها
لو مات شهيد فى حبها
بلد العجايب والغرايب
تاريخها سابق عصرها
مين على الخريطة زيها
يا كل كاره للعمار
يا نار كونى برد فى قلبها
مصر اللى فيها الاختيار
فبلاش تخاريف الزمن
تصور لكم إن المحن
تقدر تهد عشها
أو تقفل لها بالجهل دار
مصر وطن كل العرب
مصر الأبية العصية
مهد أديان السماء
ومهما اشتد فيها البلاء
صوت المآذن والكنائس
يرطب القلب العليل
فمستحيل
تنزل فى ساحة دروشة
ويذهب العقل القوى
او يقف فى طابور
جوه ساحة الانتظار
التعليقات مغلقة.