وأديني بأغني من تاني من ديوان راجع أغني من تاني
(للشاعر محمد الشريف)
وأديني بغني من تاني
وهانسي كل أحزاني
واكتب بالقلم غنوة
يجوزتحيي العليل تاني
واديني بغني من تاني
و اوصف للحبيب وصفة
ترطّب قلبه شوق وحنان
وابعت للحبيب مرسال
حبيبي اكيد نسي العنوان
واه يا ظنون معندانى
اديني بغنّي من تاني
راح اكتب مَصر في الغنوة
دي مَصر صبية عجباني
وهارسم ليكي ميت رسمة
والوِّنها… بوجداني
ما هو انتي في روحى وكياني
وأديني بغني من تاني
هافصّل للوطن فستان
بخيط الفجروالنسمة
واقول للصحرا يا البستان
فتضحك روحي مبتسمة
وتسقى الصدق ف لسانى
وادينى بغنى من تانى
هاقوم وازرع بدور وردة
واشم الصبر في عيونك
واقول يا عيونك الشاردة
تعالي في حضنى وهاصونك
ونطرح طرح انسانى
وادينى بغنى من تانى
حبيبتي يا الوطن موال
يا مصر الأصل والمعنى
فداكي الروح فداكى المال
يا طاقة نور بتجمعنا
يامصر يا زادي وامانى
وادينى بغنى من تانى
بخبَّط للبراح الباب
هرم عالي يليق بيكي
يجمَّع بهجة الاحباب
وعين المولى ترقيكى
يابلدى معاكى بلقانى
وادينى بغنى من تانى
يا وطني العزوة والأولاد
هاربي في القلوب حبَّك
معاك طعم الحياة مداد
وهاحفظ للولاد أرضك
ماهو انت الأصل والحاني
واديني بغني من تاني
التعليقات مغلقة.