واحشني يا بابا…
جمال زكي عينر
هذا المشهد دائما اتخيله لنفسي
بصحيه م النوم
زي كل يوم
بقول له يا بابا
كفايه بقى نوم
ماردش عليا
ما طلعش حس
لا بص ف عينيه
ولا قاللي بس
قلقت وجريت
على امي وناديت
وكنت بعيط
ونازله صويت
وقلت يا ماما
تعالي الحقيني
ده بابا حبيبى
مالوش اي صوت
جسينا في نبضه
وقلبنا فيه
ونزلت في لحظه
دموع من عينيه
عرفت ساعتها
نهاية السباق
وإن دموعه
دموع الفراق
ده بعدك يا بابا
ماعادشي في بيت
ده كنا بحسك
وكان لينا صيت
واحشني زعيقك
واحشني الشخيط
يا ريتني يا بابا
مكانك ياريت
واحشني يا بابا
مشتاقة لصوتك
واحشني كلامك
واحشني سكوتك
واحشني أما كنت
تاخدني في حضنك
ماجاش يوم في بالى
اشوفك في موتك
انا عارفه يا بابا
زعلتك كتير
وكنت تسامحني
كان قلبك كبير
طول عمرك حنين
ما بتشيلش ابدا
وحتى أما تزعل
كان سرك في بير
الهي يا ربي
يارب العباد
تخلي له قبره
جنان الرياض
ووسع له فيه
بطول المدى
واحسن لقاؤه
في يوم المعاد
بقلمي الشاعر جمال زكي عينر
التعليقات مغلقة.