” واقف على الشط ” بقلم الشاعر/محمد الشناوي الشيوي
وعشان البحر الواسع
مني بيخاف
اشخط في الموج
فيحايل فيا
وجيب اصداف
فبحرر قلبه الدايب
من التوهان
اصل أنا إنسان
خد قلبي خلاص
وياريت تديني
قلب بداله من الصفصاف
احلم بنسيم الشوق
يحبي
ويسبسب شعري
لحد الارض
ماهو فات كام فرض
وأنا بحلف إننا صليتهم
قبل الاشواط
حوالينا شياط
بيشعلل قول البنآدمين
كل المساكين بيروحو
يباتو هناك على الشط
في موت القول
الحب فصول لكن نافره
ومراره الايام سافره
والناس كالموج
يغدر في سعات
يكذب في سعات
وفي لحظه بننسي
إننا اخوات
الدنيا روفات
تتدردر بين السما والارض
وأهي شاشه العرض
بعلم وصول
كان ليا رسول
ولازال ساكن في حبابي
الروح
من قبل ميلادي
لبعد مماتي في همزه وصل
فمحال الفصل
بين قول الموج
وشغف للشطوط
الحب ياقوت
وفصوله لسه معرفهاش
لكثير من الخلق
الموج كالبرق
بيلاحق بعضه لكن بنظام
السنه ايام
وكتير بتعدي مبنعشهاش
ياما قال الشاش
على الجرح كتير
ماأنا كنت سفير
بين ضحكه وآهه ونظره عين
دلوقت أنا فين
وأيه أدواري هناك على الشط
القول وإن حط
بيعجلو نقله إلى مسواه
الموج دا حياه
والبحر إيمانه شط نجاه
لوإن الموج على الشط
بيموت
كما رقص التوت علي
عود صفصاف
عاهدني يبقى مكان قلبي
ونساني وراح
واهو عارف قلبي
شطوطه براح
وأهو فاتني وراح
واقف على الشط
التعليقات مغلقة.